މިދިޔަ ސަރުކާރުގެ ދުވަސްވަރު އިކޮނޮމިކް ކައުންސިލުން ދީފައިވާ ލަފަޔަކާ ގުޅިގެން، ތިމާވެށްޓާ ބެހޭ ކުރީގެ މިނިސްޓަރު އާމިނަތު ޝައުނާ އެންޓި ކޮރަޕްޝަން ކޮމިޝަން (އޭސީސީ) އަށް ހާޒިރުކޮށް ސުވާލުކޮށްފިއެވެ.

މިކަމާ ގުޅޭގޮތުން ޝައުނާ މީސްމީޑިއާގައި ވިދާޅުވީ، އޭނާ އޭސީސީއަށް ހާޒިރުކުރީ އިކޮނޮމިކް ކައުންސިލުން ދިން ލަފަޔަކާ ގުޅިގެން ކަމަށެވެ. ނަމަވެސް، އޭނާގެ މިނިސްޓަރުކަމުގެ ދައުރުގައި ދިވެހިރާއްޖޭގެ ގާނޫނުއަސާސީ އާއި ގާނޫނުތަކާ ހިލާފު އެއްވެސް ކަމެއް ކުރައްވާފައި ނުވާނެ ކަމުގެ ޔަގީންކަން ޝައުނާ ވަނީ ދެއްވާފައެވެ.

މި މައްސަލައާ ގުޅޭ އިތުރު މައުލޫމާތު ދެއްވަމުން ޝައުނާ ވިދާޅުވީ، އޭނާއާ އިއްޔެ ސުވާލުކޮށްފައިވަނީ އިކޮނޮމިކް ކައުންސިލްގެ ލަފަޔަކާ ގުޅޭގޮތުން ކަމަށެވެ. އެނގިފައިވާ ގޮތުގައި އޭސީސީން މިހާރު ތަހުގީގު ކުރަމުން ދަނީ ބަދަލު ދިނުމުގެ މައްސަލައެއްގައި އިކޮނޮމިކް ކައުންސިލުން ދިން ލަފައަކާ ގުޅޭ މައްސަލައެކެވެ.

I was summoned by the ACC this morning over a recommendation made by the Economic Council.

Every engagement I have undertaken as Minister of Environment, Climate Change and Technology was lawful and fully compliant with the Constitution and the laws of the Maldives.

— Shauna Aminath 🎈❓ (@anuahsa) March 2, 2026

ސަރުކާރާއި އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ހައްލުކުރުމުގައި އަމަލުކުރާނެ ގޮތުގެ އުސޫލެއް އެކުލަވައިލީ ނޮވެމްބަރު 28، 2022 ގައެވެ. އެ އުސޫލުގެ ދަށުން ބަދަލު ދިނުމުގެ ކަންކަން ކުރިއަށް ގެންދަނީ އެކަމަކާ ގުޅޭ އިދާރާއަކުން މައްސަލަ ތަހުގީގު ކުރުމަށްފަހު، ސެޓްލްމެންޓް ކޮމިޓީއަށް ހުށަހެޅުމުންނެވެ. އެއަށްފަހު އެ ކޮމިޓީން ދިރާސާކޮށް އިކޮނޮމިކް ކައުންސިލަށް ހުށަހެޅުމުން، އެ ކައުންސިލުން ދޭ ލަފަޔަކަށް ކެބިނެޓުގައި މަޝްވަރާކުރުމަށްފަހު ބަދަލު ދިނުމުގެ ކަންކަން ނިންމައެވެ.

އޭސީސީން ތަހުގީގު ކުރަމުންދަނީ ސީދާ ކޮން މައްސަލައެއްކަން އަދި ރަސްމީކޮށް ހާމަކޮށްފައި ނުވި ނަމަވެސް، މިއީ ބަދަލު ދިނުމުގެ މައްސަލައަކަށް ވާތީ، ސެޓްލެމެންޓް ކޮމިޓީ އާއި އިކޮނޮމިކް ކައުންސިލްގެ އިތުރުން އޭރުގެ ކެބިނެޓުގައި ތިއްބެވި އެހެން ވަޒީރުންވެސް ތަހުގީގަށް ހާޒިރުކުރާނެ ކަމަށް ބެލެވެއެވެ.