ސަރުކާރުގެ ބަޖެޓް ހަރަދުތައް ހަމަޖެއްސުމަށްޓަކައި 3.4 ބިލިއަން ރުފިޔާގެ ޓީ-ބިލް (ޓްރެޒަރީ ބިލް) ވިއްކުމަށް މިނިސްޓްރީ އޮފް ފިނޭންސް އިން ހުޅުވާލައިފިއެވެ. މިއީ މިއަހަރުގެ ތެރޭގައި ސަރުކާރުން ޓީ-ބިލް ވިއްކަން ހުޅުވާލި ފަސްވަނަ ފަހަރެވެ.

ފިނޭންސް މިނިސްޓްރީން މިފަހަރު ވިއްކުމަށް އިޢުލާންކޮށްފައިވަނީ ތަފާތު ހަތަރު މުއްދަތެއްގައި އަނބުރާ ދައްކާ ގޮތަށް ހަމަޖެހިފައިވާ ޓީ-ބިލްތަކެކެވެ. އޭގެ ތެރޭގައި ހިމެނެނީ އޭޕްރީލް 6 ވަނަ ދުވަހުގެ ނިޔަލަށް އަނބުރާ ދެއްކުމަށް ހަމަޖެހިފައިވާ 1.1 ބިލިއަން ރުފިޔާގެ ޓީ-ބިލަކާއި، ޖޫން 15 ވަނަ ދުވަހަށް އަނބުރާ ދެއްކުމަށް ހަމަޖެހިފައިވާ 418 މިލިއަން ރުފިޔާގެ ޓީ-ބިލަކާއި، ސެޕްޓެމްބަރު 7 ވަނަ ދުވަހަށް އަނބުރާ ދެއްކުމަށް ހަމަޖެހިފައިވާ 182 މިލިއަން ރުފިޔާގެ ޓީ-ބިލަކާއި، އަންނަ އަހަރުގެ ފެބްރުއަރީ 22 ވަނަ ދުވަހަށް އަނބުރާ ދެއްކުމަށް ހަމަޖެހިފައިވާ 1.6 ބިލިއަން ރުފިޔާގެ ޓީ-ބިލެކެވެ.

މި ޓީ-ބިލްތަކުގެ އިންޓްރެސްޓް ރޭޓްތައް އުޅެނީ 3.50 އިންސައްތައާއި 4.60 އިންސައްތައާ ދެމެދުގައެވެ.

ޓީ-ބިލަކީ ސަރުކާރުގެ ކުރު މުއްދަތުގެ ހަރަދުތައް ހަމަޖެއްސުމަށްޓަކައި ގަވަރުމަންޓް ސެކިއުރިޓީޒްގެ ދަށުން ދޫކުރާ މާލީ ވަސީލަތެކެވެ. ރާއްޖޭގައި މި ޓީ-ބިލްތައް އާންމުކޮށް ގަންނަނީ މޯލްޑިވްސް ރިޓަޔަރމަންޓް ޕެންޝަން އެޑްމިނިސްޓްރޭޝަނާއި، ބޭންކުތަކުގެ އިތުރުން ސަރުކާރު ހިއްސާވާ ކުންފުނިތަކުންނެވެ. މީގެ އިތުރުން ބައެއް އަމިއްލަ ކުންފުނިތަކުންވެސް ޓީ-ބިލްތަކަށް އިންވެސްޓް ކުރެއެވެ.

ދިވެހި ސަރުކާރުން ދޫކުރާ ޓީ-ބިލަކީ ދިވެހި ރުފިޔާއިން، ޑިސްކައުންޓް އަގެއްގައި ވިއްކުމަށް ހުށަހަޅާ އެއްޗެކެވެ. އަދި މުއްދަތު ހަމަވުމުން، ސަރުކާރުން އެ ފައިސާ އަނބުރާ ދައްކަނީ އޭގެ ފޭސް ވެލިއު ނުވަތަ މޫނުމަތީ އަގަށެވެ.