މިހާރު ކުރިއަށްދާ އައިސްޕްލާންޓްތަކުގެ މަސައްކަތްތައް ނިންމައި، މިއަހަރުގެ ތެރޭގައި އެ ތަންތަން އޮޕަރޭޝަނަށް ގެނައުމަކީ ސަރުކާރުގެ ބޮޑު އަމާޒެއް ކަމަށް މަސްވެރިކަމާއި ކަނޑުގެ ވަޞީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ވަޒީރު ވިދާޅުވީ، މަސްވެރިންނަށް ދިމާވާ އައިސް ލިބުމުގެ ދަތިތަކަށް ދާއިމީ ހައްލެއް ހޯދައިދިނުމަށްޓަކައި ސަރުކާރުގެ ބަޖެޓުންނާއި ސަޢުދީ ފަންޑުގެ އެހީގައި ގިނަ މަޝްރޫޢުތަކެއް ރޭވިފައިވާ ކަމަށެވެ. އެގޮތުން މިހާތަނަށް ހަ ރަށެއްގައި ގާއިމުކުރި އައިސްޕްލާންޓްތައް އޮޕަރޭޝަނަށް ގެނެސްފައިވާއިރު، އޭގެ ސަބަބުން އުތުރާއި ހުވަދު އަތޮޅުގެ މަސްވެރިންނަށް ބޮޑެތި ލުއިފަސޭހަތަކެއް ލިބިގެންދާނެ ކަމަށް ވަޒީރު ފާހަގަކުރެއްވިއެވެ.

ވަޒީރު ޝިޔާމް ވިދާޅުވި ގޮތުގައި މިވަގުތުވެސް ރާއްޖޭގެ ނުވަ ރަށެއްގައި އައިސްޕްލާންޓް ގާއިމުކުރުމުގެ އަމަލީ މަސައްކަތްތައް އެކި މަރުހަލާތަކުގައި ދަނީ ކުރިއަށެވެ. އޭގެ ތެރޭގައި ލ. އަތޮޅުގެ މާބައިދޫ، މާވަށް، އަދި ހިތަދޫގެ އިތުރުން މ. ވޭވަށް، ޅ. ނައިފަރު، ށ. ކޮމަންޑޫ، މ. މުލައް، ކުޅުދުއްފުށި ސިޓީ އަދި ދ. ހުޅުދެލި ހިމެނެއެވެ. މީގެ އިތުރުން ސަޢުދީ ފަންޑުގެ އެހީގައި ގދ. ރަތަފަންދޫ، އއ. ރަސްދޫ، ހއ. ދިއްދޫ، ގއ. ދާންދޫ، އަދި ކ. ގާފަރުގައި އައިސްޕްލާންޓް އެޅުމަށް ވަނީ ނިންމާފައެވެ. އަދި ސަރުކާރު ބަޖެޓުން ގއ. ނިލަންދޫ، ވިލިނގިލި، އަދި މާމެންދޫގައިވެސް އައިސްޕްލާންޓް އެޅުމުގެ މަސައްކަތް ކުރިއަށްދާނެ ކަމަށް ވަޒީރު ވިދާޅުވިއެވެ.

ސަރުކާރުގެ މިސްރާބު ހުރީ މިއަހަރުގެ ތެރޭގައި ޖުމްލަ 23 އައިސްޕްލާންޓެއްގެ މަސައްކަތް ނިންމައި ޚިދުމަތް ދޭން ފެށުމަށެވެ. ވަޒީރު ވިދާޅުވީ މި މަޝްރޫޢުތައް ނިމުމުން، މޫސުމީ މަސްވެރިކަން ރަނގަޅުވާ ދުވަސްވަރު މަސްވެރިންނަށް ކުރިމަތިވާ އައިސްގެ ދަތިކަން އެއްކޮށް ހައްލުވެގެންދާނެ ކަމަށެވެ.

އައިސްޕްލާންޓްތަކުގެ އިތުރުން، މަސް ރައްކާކުރެވޭ މިންވަރު އިތުރުކުރުމަށްޓަކައި ކޯލްޑް ސްޓޯރޭޖް ކެޕޭސިޓީ 9،500 މެޓްރިކް ޓަނުން 25،000 މެޓްރިކް ޓަނަށް އިތުރުކުރުމުގެ މަސައްކަތްވެސް ބާރުމިނުގައި ކުރިއަށްދާކަން ވަޒީރު ފާހަގަކުރެއްވިއެވެ.

ކޯލްޑް ސްޓޯރޭޖް އިތުރުކުރުމުގެ މަސައްކަތުގެ ދަށުން ކޫއްޑޫ އާއި ފެލިވަރުގައި 4،000 ޓަނުގެ ކެޕޭސިޓީ އިތުރުކުރުމާއި، ގދ. ތިނަދޫގައި 1،000 ޓަނު އަދި މުލަކާއި ހުޅުމީދޫގައި 500 ޓަނުގެ ސްޓޯރޭޖް ގާއިމުކުރުމުގެ މަސައްކަތް ދަނީ ކުރަމުންނެވެ. މީގެ އިތުރުން ތ. ހިރިލަންދޫ، ހއ. އިހަވަންދޫ، އަދި ކަނޑުއޮއްގިރީގައިވެސް ކޯލްޑް ސްޓޯރޭޖްގެ ޚިދުމަތް ފުޅާކުރުމަށް ސަރުކާރުން ވަނީ ނިންމާފައެވެ. މި ހުރިހާ މަސައްކަތްތަކަކީ މަސްވެރިކަމުގެ ސިނާޢަތް ކުރިއަރުވައި، މަސްވެރިން ބާނާ މަހަށް ހަމަ އަގު ހޯދައިދިނުމަށް ކުރެވޭ މުހިންމު މަސައްކަތްތަކެއް ކަމަށް ވަޒީރު ޝިޔާމް ވިދާޅުވިއެވެ.