ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށްލުމަކީ ދެއިރު ކައިގެން ތިބޭ ބަޔަކު ކައިރީގައި އެއްއިރު ކައިގެން ތިބޭށޭ ބުނުން ފަދަ ކަމެއް ކަމަށް އިދިކޮޅު އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.

އެމްޑީޕީ ހަރުގޭގައި ބޭއްވި ޚާއްޞަ ޖަލްސާގައި ވާހަކަ ދައްކަވަމުން ޝާހިދު ވިދާޅުވީ، ސަރުކާރުން މި ބަދަލު ގެންނަން މަސައްކަތް ކުރަނީ ރައްޔިތުންގެ އަތްމަތީގައި އޮތް ބާރުތައް ހަނިކޮށް، ގައުމުގެ ޑިމޮކްރެޓިކް ނިޒާމު ފުނޑާލުމުގެ ނިޔަތުގައި ކަމަށެވެ. ޝާހިދު ސިފަކުރެއްވި ގޮތުގައި މިއީ ރައްޔިތުންނަށް ލިބިދީފައިވާ ސިޔާސީ ބާރުވެރިކަން ކުޑަކުރުމަށްޓަކައި ހިންގާ އަމަލެކެވެ.

"ދެ އިންތިޚާބު އެއްކޮށް ބޭއްވުމަކީ ދެއިރު ކައިގެން ތިބޭ ބަޔަކު ކައިރީ އެއްއިރު ކައިގެން ތިބޭށޭ ބުނުން ކަހަލަ ކަމެއް،" ޝާހިދު ވިދާޅުވިއެވެ.

ޝާހިދު އިތުރަށް ފާހަގަކުރެއްވި ގޮތުގައި، އިންތިޚާބުތަކަކީ ސިޔާސީ ވެރިން ރައްޔިތުންގެ ގާތަށް ގޮސް، އެމީހުންގެ ކަންބޮޑުވުންތަކާއި ޝަކުވާތައް އަޑުއެހުމަށް ލިބޭ އެންމެ މުހިންމު ފުރުސަތެވެ. ނަމަވެސް، ޚަރަދު ކުޑަކުރުމުގެ ބަހަނާ ދައްކައިގެން ދެ އިންތިޚާބު އެއްކޮށްލަން އުޅެނީ ރައްޔިތުންގެ

އަޑު އިވޭ މިންވަރު މަދުކުރުމަށް ކަމަށް އޭނާ ތުހުމަތު ކުރެއްވިއެވެ.

ސަރުކާރުން އިގްތިސާދީ ގޮތުން ޚަރަދު ކުޑަކުރުމުގެ ވާހަކަ ދެއްކި ނަމަވެސް، މިހާތަނަށް އެކަން އަމަލީ ގޮތުން ކުރެވެމުންދާ ގޮތް ރައްޔިތުންނަށް ސާފުކޮށްދެވިފައި ނުވާ ކަމަށް ޝާހިދު ވިދާޅުވިއެވެ. އަދި މިހާރުގެ ސަރުކާރުން ރައްޔިތުންނަށް ވަރަށް ބޮޑަށް އޮޅުވާލަމުންދާ ކަމަށާއި، މިކަމުގެ ހަގީގަތް ރައްޔިތުންނަށް ވިސްނައިދިނުމަކީ އެމްޑީޕީގެ ޒިންމާއެއް ކަމަށް އޭނާ ވިދާޅުވިއެވެ.

ޑިމޮކްރަސީގެ އަސާސަކީ ރައްޔިތުންގެ ބަސް އިއްވުމާއި ރައްޔިތުންގެ އިހުސާސްތަކާ އެއްގޮތަށް ކަންކަން ކުރުން ކަމަށް ވާއިރު، މިހާރުގެ ސަރުކާރުގެ ވެރިންނަކީ ޑިމޮކްރަސީއަށް އިހުތިރާމްކުރާ ބައެއް ނޫން ކަމަށް ވިދާޅުވެ ޝާހިދު ވަނީ ވަރަށް ބޮޑަށް ފާޑުވިދާޅުވެފައެވެ.