2026 ވަނަ އަހަރުގެ ޖެނުވަރީ މަހުގެ ނިޔަލަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއަށް ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ ޖުމްލަ 64 މައްސަލައެއް ރިޕޯޓުކޮށްފައިވާ ކަމަށް އެ ވުޒާރާގެ ތަފާސްހިސާބުތަކުން ދައްކައިފިއެވެ.

އެ ވުޒާރާގެ ތަފާސް ހިސާބަށް ބަލާއިރު، އެންމެ ގިނައިން ރިޕޯޓުކޮށްފައިވަނީ ކުޑަކުދިންނަށް އިހުމާލުވުމުގެ މައްސަލަތަކެވެ. އެގޮތުން އިހުމާލުވުމުގެ 30 މައްސަލައެއް ޖެނުއަރީގެ ނިޔަލަށް ވަނީ ހުށަހަޅާފައެވެ. މީގެ ތެރޭގައި ހިމެނެނީ ފިރިހެން ކުދިންނާ ގުޅޭ 19 މައްސަލައަކާއި އަންހެން ކުދިންނާ ގުޅޭ 11 މައްސަލައެކެވެ.

ދެވަނައަށް އެންމެ ގިނައިން ހުށަހަޅާފައިވަނީ ޖިންސީ ހާނިއްކައިގެ މައްސަލަތަކެވެ. މިބާވަތުގެ ޖުމްލަ 13 މައްސަލައެއް ރިޕޯޓުކޮށްފައިވާއިރު، އޭގެ ތެރޭގައި ހިމެނެނީ އަންހެން ކުދިންނާ ގުޅޭ 11 މައްސަލައަކާއި ފިރިހެން ކުދިންނާ ގުޅޭ 2 މައްސަލައެކެވެ.

މީގެ އިތުރުން އެ ވުޒާރާއަށް ހުށަހެޅުނު އެހެނިހެން މައްސަލަތަކުގެ ތެރޭގައި ގެވެށި އަނިޔާގެ އަމަލެއް ކުރާތަން ކުއްޖަކަށް ދެއްކުން ނުވަތަ ފެނުމާގުޅޭ 08 މައްސަލަ އާއި، ނަފްސާނީ ހާނިއްކައިގެ 07 މައްސަލަ އާއި، ޖިސްމާނީ ހާނިއްކައިގެ 04 މައްސަލަ އާއި، ކުޑަކުދިންގެ ބަދުއަޚްލާގީ އަމަލު ހިންގާ ވީޑިއޯތަކާ ގުޅޭ 01 މައްސަލަ އާއި، ބިރުދެއްކުމުގެ ގޮތުން ބްލެކްމެއިލް ކުރުމުގެ 01 މައްސަލް ހިމެނެއެވެ.

ޖެނުވަރީ މަހު ރިޕޯޓުކޮށްފައިވާ މި ހުރިހާ މައްސަލަތަކަށް ބަލާއިރު، އަނިޔާ ލިބިގެން ރިޕޯޓުކޮށްފައިވަނީ އަންހެން ކުދިންގެ 32 މައްސަލައަކާއި ފިރިހެން ކުދިންގެ 32 މައްސަލައެވެ.

އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން އަންނަނީ ކުޑަކުދިންނާއި ގުޅުންހުރި މިފަދަ މައްސަލަތައް ބަލައި، ކުޑަކުދިންގެ ހައްގުތައް ރައްކާތެރިކުރުމަށް އެކަށީގެންވާ ފިޔަވަޅުތައް އަޅަމުންނެވެ.