މެދުއިރުމަތީގައި އިޒްރޭލުން ހިންގަމުންދާ ލާއިންސާނީ އަމަލުތަކާއި ކުރަމުންދާ ހަނގުރާމައަކީ ހަމައެކަނި "މެދުއިރުމަތީގެ ހަމަނުޖެހުން" ކަމަށް ބުނެ ނަންދިނުމަކީ ވަރަށް ބޮޑު ބޭއިންސާފެއް ކަމަށް ކުރީގެ ރައީސް އަލްއުސްތާޛު މައުމޫން އަބްދުލްގައްޔޫމް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، އެމެރިކާ އާއި އިސްރާއީލް ގުޅިގެން އީރާނަށް ދެމުންގެންދާ ވަރުގަދަ އުދުވާނީ ހަމަލާތަކާ ގުޅިގެން ސޯޝަލް މީޑިއާގައި ކުރެއްވި ޕޯސްޓެއްގައެވެ. ރައީސް މައުމޫން ވިދާޅުވީ، އިޒްރޭލާއި އެމެރިކާ ގުޅިގެން އީރާނަށް ދެމުންދާ ހަމަލާތަކަށް "މެދުއިރުމަތީގެ ހަމަނުޖެހުން" ފަދަ އާދައިގެ ނަމެއް ކިޔުމަކީ ހަގީގަތް އޮޅުވާލުން ކަމަށެވެ.

"އެމެރިކާ އާ އިސްރާއީލާ ގުޅިގެން އީރާނަށް ދިން ވަރުގަދަ އުދުވާނީ ހަމަލައަށް މެދުއިރުމަތީގެ ހަމަނުޖެހުމޭ ކިޔުމަކީ ވަރަށް ބޮޑު ބޭއިންސާފެއް،" މައުމޫން ވިދާޅުވިއެވެ.

އެމެރިކާ އާ އިސްރާއީލާ ގުޅިގެން އީރާނަށް ދިން ވަރުގަދަ ޢުދުވާނީ ޙަމަލައަށް މެދުއިރުމަތީގެ ހަމަނުޖެހުމޭ ކިޔުމަކީ ވަރަށްބޮޑު ބޭއިންސާފެއް. ޙަޤީޤަތް ބުނަން ކެރަމާތޯ؟

— Maumoon Abdul Gayoom (@maumoonagayoom) March 1, 2026

މީގެ އިތުރުން، ބައިނަލްއަގުވާމީ މުޖުތަމައަށް ސުވާލެއް އަމާޒުކުރަށްވަމުން އެމަނިކުފާނު ވަނީ މިކަމުގެ ހަގީގަތް ހާމަކުރަން ކެރޭނެތޯ ސުވާލު އުފައްދަވާފައެވެ. ރައީސް މައުމޫން އަބަދުވެސް ވަކާލާތު ކުރައްވަނީ އިޒްރޭލުން ފަލަސްތީނާއި މެދުއިރުމަތީގެ އެހެން ގައުމުތަކަށް ދެމުންދާ ހަމަލާތަކަކީ ބައިނަލްއަގުވާމީ ގާނޫނުތަކާ ހިލާފު އުދުވާނެއްގެ ގޮތުގައެވެ.

އެމެރިކާއާއި އިޒްރޭލުން އީރާނަށް ޙަމަލާ ދެމުންދާއިރު އީރާނުން ގެންދަނީ މެދުއިރުމަތީގެ ޤައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް ޙަމަލާ ދެމުންނެވެ. މެދުއިރުމަތީގެ މަސްރަހު މިހާރު އޮތް ނުތަނަވަސް ހާލަތުގައި، އިޒްރޭލުގެ އަމަލުތައް ކުށްވެރިކޮށް ދިވެހި ރައްޔިތުން ވެސް ގެންދަނީ އަޑުއުފުލަމުންނެވެ.

ނަމަވެސް އިޒްރޭލުން އީރާނަށް ދެމުންދާ ޙަމަލާތައް ކުށްވެރިކުރުމުގައި ސަރުކާރުން ފަހަތުފަޔަށް ބުރަ ވެފައިވާކަމަށް މީސްމީޑިއާގައި ގިނަ ބަޔަކު ދަނީ ބުނަމުންނެވެ.