ހދ. ކުރިނބީއަށް ކުރެއްވި ޒިޔާރަތުގައި، އެ ރަށުން ފެނުނު ލޯބިވެތި އަދި ހިތްގައިމު މަންޒަރުތަކަށް މަޝްހޫރު ދީނީ އިލްމުވެރިޔާ އަލީ ރަމީޒު ނުހަނު ބޮޑަށް ތައުރީފު ކުރައްވައިފިއެވެ.

އަލީ ރަމީޒު ކުރެއްވި ފޭސްބުކް ޕޯސްޓެއްގައި ވިދާޅުވީ، ކުރިނބީއަކީ ވަރަށް އަމާން އަދި ހިތްގައިމު ރަށެއް ކަމަށާއި، އެ ރަށުގެ ރީތިކަން ބައްލަވާލެއްވުމަށް ޒިޔާރަތްކުރުމަކީ ލިބޭނެ ބޮޑު އުފަލެއް ކަމަށެވެ. "މާޝާﷲ" ވިދާޅުވަމުން އޭނާ ވަނީ އެ ރަށުގެ މެހެމާންދާރީއާއި މާހައުލަށްޓަކައި އުފާކުރާކަން ހާމަކުރައްވާފައެވެ.

ކުރިނބީގައި ހޭދަކުރެއްވި ވަގުތުތަކުގެ ތަޖުރިބާ ހިއްސާކުރައްވަމުން އަލީ ރަމީޒު ފާހަގަކުރެއްވި ގޮތުގައި، ގާތްގަނޑަކަށް 700 އެއްހާ މީހުންގެ އާބާދީއެއް އޮންނަ އެ ރަށަކީ ނަމޫނާ އެއްބައިވަންތަކަމެއް އޮތް ރަށެކެވެ. ވަކިން ހާއްސަކޮށް، ރަށުގެ ފިރިހެނުންނާއި އަންހެނުން އެކުވެގެން ދޯންޏެއް އެހެލުމަށްޓަކައި އެއްވި މަންޒަރަކީ އޭނާގެ ހިތުގައި ބޮޑު ޝައުގުވެރިކަމެއް އުފެއްދި ކަމެއްކަން ފާހަގަކުރެއްވިއެވެ. މި މަންޒަރަކީ ކުރިނބީގެ ރައްޔިތުންގެ މެދުގައި އޮތް ވަރުގަދަ ގުޅުމާއި، އެކަކު އަނެކަކަށް އެހީތެރިވުމުގެ ރޫހު ރަމްޒުކޮށްދޭ ހެއްކެއްގެ ގޮތުގައި އޭނާ ސިފަކުރެއްވިއެވެ.

މި ޒިޔާރަތުގެ ތެރެއިން ކުރިނބީގެ ރައްޔިތުންގެ ފަރާތުން ލިބުނު ލޯތްބާއި ގާތްކަމަށްޓަކައި އަލީ ރަމީޒު ވަނީ ޝުކުރު އަދާކުރައްވާފައެވެ. އަދި މިފަދަ އެކުވެރި މުޖުތަމައުތަކަކީ މުޅި ރާއްޖެއަށްވެސް ނަމޫނާއެއްކަން ފާހަގަކުރައްވައި، ކުރިނބީގެ އަމާންކަން ދެމެހެއްޓުމަށް އެދިވަޑައިގެންނެވިއެވެ.