ކާއްޓަކީ އަޅުގަނޑުމެންނަށް ވަރަށް ފަސޭހައިން ލިބެން ހުންނަ އަދި ވަރަށް ގިނަ ކަންކަމަށް ބޭނުން ކުރާ އެއްޗެކެވެ. ކެއިންބުއިމާއި، ސިއްހަތަށް ރަނގަޅު ތަކެތި ހެދުމުގައި ކާށީގެ ބޭނުން ވަރަށް ގިނައެވެ. އެހެންނަމަވެސް، ކާށި ކިރުގެ ސިއްހީ ފައިދާތަކުގެ އިތުރުން، ހަންގަނޑަށް ލިބޭ ފައިދާތައް ގިނަ ބަޔަކަށް ނޭނގިދާނެއެވެ. ޤުދުރަތީ ގޮތުން ލިބިފައިވާ ފައިދާ ތަކަކާއެކު، ކާށި ކިރަކީ ހަންގަނޑުގެ ރީތިކަމަށް ވަރަށް ބޮޑު އެހީއަކަށް ވެދާނެ އެއްޗެކެވެ.

މިފަހަރު މި ހިމަނާލަނީ ކާށި ކިރުން ހަންގަނޑަށް ލިބޭ ބައެއް ފައިދާތަކެވެ.

ކާށިކިރަކީ ހަންގަނޑަށް ތެތްކަން ގެނެސްދޭން އެހީވާ، ފެޓީ އެސިޑްސް އައި ވިޓަމިން އީ އިން މުއްސަންދި އެއްޗެކެވެ. މި މާއްދާތަކުގެ ސަބަބުން، ހަންގަނޑު ހިކި، ރޫޖެހުމުން ރައްކާތެރިކޮށްދެއެވެ. އަދި ހަމުގެ އެންމެ ބޭރު ފަށަލަ ވަރުގަދަކޮށް، ހަމުގައި ތެތްކަން ހިފަހައްޓައިދެއެވެ. ނަތީޖާއެއްގެ ގޮތުން، ހަންގަނޑު އަބަދުވެސް އޮމާންކޮށް ބަހައްޓައިދެއެވެ.

ކާށި ކިރަކީ އޭގައި އެންޓި-އިންފްލެމޭޓަރީ ޕްރޮޕަޓީތައް އެކުލެވޭ އެއްޗެއްކަމުން މި ބޭނުން ކުރުމުބް ހަންގަނޑު ރަތްވުން ހުއްޓުވައިދީ، ދުޅަވުން ކުޑަކޮށްދީ، ބިހި ނެގުން ފަދަ މައްސަލަތައް މަދުކޮށްދެއެވެ. އަދި އެކްޒީމާ އާއި ސޯރިއަސް ފަދަ ހަމުގެ ބަލިތަކުން ދިމާވާ މައްސަލަތައް ހައްލު ކުރުމަށްވެސް އެހީވެދެއެވެ.

މިއީ ގިނަ އަދަދަކަށް އެންޓި އޮކްސިޑެންޓުތައް ހިމެނޭ އެއްޗެއްކަމުން ހަންގަނޑަށް ގެއްލުންދޭ ފްރީ ރެޑިކަލްސްތަކުން މީހާ ރައްކާތެރިކޮށްދެއެވެ. ފްރީ ރެޑިކަލްސް އަކީ ހަމުގެ ސެލްތަކަށް ގެއްލުންދީ، ހަންގަނޑު މުސްކުޅިވުމަށް އަވަސްކުރުވާ އެއްޗެކެވެ. ކާށި ކިރުގެ ބޭނުންކުރުމުން، ހަންގަނޑުގައި ރޫޖެހުން ހުއްޓުވައިދީ ހަންގަނޑުގެ ޒުވާންކަން ދަމަހައްޓައިދެއެވެ.