ރައީސް ޑރ. މުހައްމަދު މުއިއްޒު އުޑުގަ ޖެހިފަ ބިމުގަ ޖެހުނަސް ޕީއެންއެފްގެ ޓައުންހޯލް ޖަލްސާ ކުރިއަށްދާނެ ކަމަށް ކުރީގެ ސައިންސް މިނިސްޓަރު އަދި ޕީއެންއެފްގައި އިސްކޮށް އުޅުއްވާ މުހައްމަދު މަލީހު ޖަމާލު ވިދާޅުވެއްޖެއެވެ.

މަލީހު މިހެން ވިދާޅުވެފައި ވަނީ މިރޭ އޮންނަ ޕީއެންއެފް ޖަލްސާގެ ކުރިން ރައީސް މުއިއްޒު މީޑިއާ ކޮންޓްރޯލު ބިލު ތަސްދީގުކުރެއްވުމާ ގުޅިގެންނެވެ. މިއަދުން ފެށިގެން މީޑިއާ އަދި ބްރޯޑްކާސްޓިން ރެގިއުލޭޝަން ޤާނޫނަށް އަމަލު ކުރަން ޖެހޭނެއެވެ.

މިކަމާ ގުޅިގެން އެކްސްގައި ހިއްސާ ކުރެއްވި ޕޯސްޓުގައި މަލީހު ވިދާޅުވީ ޤާނޫނު ފާސްކުރިޔަސް ޕީއެންއެފް ޓައުންހޯލް ޖަލްސާ ކުރިއަށްދާނެ ކަމަށެވެ.

"ކެރެންޏާ މުއިއްޒު ޖެހޭނީ އަޅުގަނޑުމެންގެ ދޫ ބުރިކޮށްލަން، ބުރިކޮށްފިއްޔާ އިޝާރާތުގެ ބަހުންވެސް މާއްދާ 27 ގެ ބޭނުން ހިފާނަން" މަލީހު ވިދާޅުވިއެވެ.

Muizz udaga jehifa bimuga jehunas PNF ge townhall kuriyah dhaane. Kerangnaa Muizz jeheynee alhugandumenge dhoo hanjarakun burikuran. Burikoffiyyaa ishaaraathuge fahunves maadhaa 27 ge beynun hifaanan. pic.twitter.com/4oBbB6PF0t

— Mohamed Maleeh Jamal (@maleehjamal) September 18, 2025

މިއަދު އަމަލު ކުރަން ފެށި މީޑިއާ އެންޑް ބްރޯޑްކާސްޓިން ޤާނޫނުގެ ދަށުން މީޑިއާތަކުން ފަތުރާ ހަބަރުތައް ވަރަށް ބޮޑަށް ކޮންޓްރޯލު ކުރެވިގެންދާނެއެވެ.

މީޑިއާ ރެގިއުލޭޓުކުރުމުގެ ބިލު ތަސްދީގުކޮށް މި ޤާނޫނަށް އަމަލުކުރަން ފަށާފައި މިވަނީ ބައެއް ނޫސްވެރިންނާއި، ބައެއް ޖަމިއްޔާތަކުން މި ބިލު ތަސްދީގުނުކުރުމަށް ގޮވާލަމުން ދަނިކޮށެވެ.