އެމްޑީޕީގެ ރިޔާސީ ޕްރައިމަރީގެ ކެމްޕޭނަށް ރައީސް އިބްރާހިމް މުހައްމަދު ސޯލިހް ފާދިއްޕޮޅު ހިންނަވަރަށް ވަޑައިގެންފިއެވެ.

އެމްޑީޕީގެ ރިޔާސީ ކެމްޕޭނަށް ރައީސް އިބްރާހިމް މުހައްމަދު ސޯލިހްގެ އުފަން ރަށް، ޅ. ހިންނަވަރަށް ވަޑައިގަތީ މިރޭ އިރާކޮޅުގެ ވަގުތެއްގައެެވެ. ހިންނަވަރަށް ވަޑައިގަތުމުން އެރަށުން ވަނީ އެމަނިކުފާނަށް ވަރަށް ހޫނު މަރުހަބާ އެއް ދަންނަވާފައެވެ. ރައީސަށް މަރުހަބާ ދެންނެވުމަށް ބަނދަރު ސަރަހައްދަށް ވަރަށް ގިނަމީހުން ވަނީ އެއްވެފައެވެ.

ޅ. އަތޮޅަށް ކުރައްވާ ދަތުރުފުޅުގައި ރައީސް މިއަދު ވަނީ ކުރެންދުއާއި ނައިފަރަށް ވެސް ވަޑައިގެންފައެވެ. ނައިފަރަށް ވަޑައިގެން ރައީސް ވަނީ ދޮރުން ދޮރަށް ހިންގަވައި ގޭގެއަށް ވަޑައިގެން ރައްޔިތުންނާއި ބައްދަލު ކުރަށްވާފައެވެ.