ރާއްޖޭގެ ކައުންސިލްތަކަށް މާލީ ގޮތުން އަމިއްލަ ފައިމައްޗަށް ތެދުވެވޭނެ އާ މަގުތަކެއް ހޯދައިދިނުމުގެ ގޮތުން، ކާބަން ކްރެޑިޓް މެދުވެރިކޮށް ޕްރޮޖެކްޓްތަކަށް ފައިސާ ހޯދޭނެ ގޮތްތައް އެމްޑީޕީގެ އިންވެސްޓްމެންޓް ފޯރަމްގައި އެ ޕާޓީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު ތަފްސީލުކޮށްދެއްވައިފިއެވެ.

އެމްޑީޕީގެ އިންވެސްޓްމަންޓް ފޯރަމްގެ ޕެނަލް ޑިސްކަޝަން ނިންމަވާލައްވަމުން ދެއްކެވި ވާހަކަފުޅުގައި އެޕާޓީގެ ޗެއާޕާސަން ރައީސް މުޙައްމަދު ނަޝީދު ވިދާޅުވީ، ޖައްވުން ނަގާ ކޮންމެ ޓަނެއްގެ ކާބަންއަކަށް ކްރެޑިޓެއް އުފެދޭ ކަމަށާއި، ބައިނަލްއަގުވާމީ މާކެޓުގައި އެއް ޓަނު ކާބަންގެ އަގު ވަރަށް މަތީގައި ހުންނަ ކަމަށެވެ. އަދި އައިއެމްއެފްގެ ތަފާސްހިސާބުތަކަށް އަލިއަޅުއްވާލައްވަމުން އެމަނިކުފާނު ވިދާޅުވީ އެއް ޓަނު ކާބަންގެ އަގު 85 ޑޮލަރަށް އަރާ ކަމަށެވެ. އެގޮތުން އިންޓަނޭޝަނަލް މަނިޓަރީ ފަންޑު (އައިއެމްއެފް) ގެ މިންގަނޑުތަކަށް ބަލާއިރު، ކޮމްޕްލަޔަންސް މާކެޓުގައި ކާބަން ޓަނެއްގެ އަގު ގާތްގަނޑަކަށް 85 ޑޮލަރުގައި ހުރިއިރު، ވޮލަންޓަރީ މާކެޓުގައި އުޅެނީ 5 ޑޮލަރާއި 30 ޑޮލަރާ ދެމެދުގެ އަގެއްގައި ކަން ރައީސް ނަޝީދު ފާހަގަކުރެއްވިއެވެ.

މިކަމުގެ މިސާލެއް ދައްކަވަމުން ފުވައްމުލަކުގެ މިސާލު ނަޝީދު ނަންގަވައިދެއްވިއެވެ. އެގޮތުން އެ ސިޓީގެ މެންގްރޫވް (ކުޅި/ހޭޅިފަތި) ސަރަހައްދުތަކުން އެކަނިވެސް އަހަރަކު ގާތްގަނޑަކަށް 82،500 ކާބަން ކްރެޑިޓް ޓަނު އުފެއްދޭނެ ކަމަށް ނަޝީދު ލަފާކުރެއްވިއެވެ. އަދި ކޮމްޕްލަޔަންސް މާކެޓުގެ ރޭޓުން ބަލާ ނަމަ، ޓަނެއް 60 ޑޮލަރަށް ވިއްކައިގެންވެސް ފުވައްމުލަކު ކައުންސިލަށް އަހަރަކު ގާތްގަނޑަކަށް 4.95 މިލިއަން ޑޮލަރު ( 89 މިލިއަން ރުފިޔާ) ލިބޭނެ ކަމަށް އެމަނިކުފާނު ވިދާޅުވިއެވެ.

ރާއްޖޭގެ އެކި ސިޓީތަކާއި ރަށްރަށުގައި ތިމާވެއްޓާ ރައްޓެހި މިފަދަ ޕްރޮޖެކްޓުތައް ހިންގައިގެން، ބޭރުގެ މާލީ އެހީތެރިކަމާއި އިންވެސްޓްމެންޓްތައް ހޯދުމުގެ ފުރުސަތު ކައުންސިލްތަކަށް އެބަ އޮތްކަން ރައީސް ނަޝީދު ފާހަގަކުރެއްވިއެވެ.

މީގެ އިތުރުން، ޖައްވަށް ދޫކުރާ ވިހަ ގޭހުގެ މިންވަރު މަދުކުރުމަށްޓަކައި ބައިނަލްއަގުވާމީ ގެންގުޅޭ ވިޔަފާރީގެ ހުއްދައެއްގެ ގޮތުގައި ކާބަން ކްރެޑިޓް ސިފަކުރައްވަމުން ރައީސް ނަޝީދު ވިދާޅުވީ، މިއީ ގައުމުތަކާއި ބޮޑެތި ކުންފުނިތަކުން ތިމާވެށި ހިމާޔަތްކުރުމަށްޓަކައި ކާބަންގެ މިންވަރު ކޮންޓޯލްކުރަން ބޭނުންކުރާ މުހިންމު ނިޒާމެއް ކަމަށެވެ.

ރައީސް ނަޝީދު ވިދާޅުވީ ޖައްވުގައިވާ ވިހަ ގޭސްތައް މަދުކޮށްގެން އުފައްދާ ކާބަން ކްރެޑިޓަށް ބައިނަލްއަގުވާމީ މާކެޓުގައި ބޮޑު އަގެއް ލިބޭއިރު، ރާއްޖެއަށްވެސް މިކަމުގެ ފައިދާ ހޯދިދާނެ ކަމަށެވެ.

މީގެއިތުރުން، ޕެރިސް އެގްރީމެންޓުގެ ދަށުން ކާބަން ކްރެޑިޓް އުފެއްދުމުގެ އުސޫލުތައް ކަނޑައެޅިފައިވާކަން ފާހަގަކުރައްވަމުން ރައީސް ނަޝީދު ވިދާޅުވީ، މިފަދަ ކަންކަން ރަސްމީކޮށް ކުރިއަށް ގެންދިއުމަށްޓަކައި ޤައުމީ ފެންވަރުގައި "ޑެޒިގްނޭޓެޑް ނެޝަނަލް އޮތޯރިޓީ" އެއް އޮންނަން ޖެހޭނެ ކަމަށެވެ.

ކާބަން ކްރެޑިޓަކީ ތިމާވެއްޓަށް ދޫކުރާ ވިހަ ގޭސް (ކާބަން ޑައިއޮކްސައިޑް) 1 ޓަނު މަދުކުރުމަށް ނުވަތަ ނައްތާލުމަށް ކުރެވޭ މަސައްކަތެއްގެ ބަދަލުގައި ލިބޭ މާލީ ސެޓްފިކެޓެކެވެ. މިއީ ގަސް އިންދުމާއި، ޖަންގަލި ހިމާޔަތްކުރުން ނުވަތަ އިޔާދަކުރަނވި ހަކަތަ ފަދަ ތިމާވެއްޓާ ރައްޓެހި ވަސީލަތްތައް ބޭނުންކޮށްގެން ކާބަން ބޭރުކުރާ މިންވަރު މަދުކުރާ ފަރާތްތަކަށް އުފެދޭ އެއްޗެކެވެ. ކާބަން ކްރެޑިޓަކީ ޖައްވުގައިވާ ވިހަ ގޭސްތައް މަދުކޮށްގެން އުފެދޭ އެއްޗެކެވެ.