މިއަހަރުގެ ފުރަތަމަ 6 މަސް ދުވަހުގެ ތެރޭގައި އެންމެ ގިނައިން ޤާނޫނީ ލަފާ ދިނީ އެއްބަސްވުންތަކާއި ގުޅޭގޮތުންކަމަށް ބަންޑާރަ ނައިބުގެ އޮފީހުން ހާމަކޮށްފިއެވެ.

ބަންޑާރ ނައިބުގެ އޮފީހުން މިހާރު ވަނީ މިއަހަރުގެ ފުރަތަމަ 6 މަސް ދުވަހުގެ ތެރޭގައި އެކި ކަންކަމުގައި ދައުލަތުގެ މުއައްސަސާތަކަށް ޤާނޫނީ ލަފާ ދެއްވި ގޮތުގެ ތަފާސް ހިސާބުތައް އާއްމުކޮށްފައެވެ.

ބަންޑާރަ ނައިބު އޮފީހުގެ ތަފާސް ހިސާބުތައް ދައްކާގޮތުން ފުރަތަަަމަ 6 މަސް ދުވަހުގެ ތެރޭގައި 471 މައްސަލައަކާއި ގުޅޭގޮތުން ޤާނޫނީ ލަފައަަކަށް އެދިފައިވާއިރު، އޭގެ ތެރެއިން 428 ކަމަކާއި ގުޅޭގޮތުން ޤާނޫނީ ލަފާދީފައިވެއެވެ.

މިއަހަރުގެ ޖަނަވަރީ މަހުން ފެށިގެން ޖޫން މަހުގެ ނިޔަލަށް މި އޮފީހުން ދިން ލަފާގެ ތަފާސްހިސާބު pic.twitter.com/YwjvEmgJhL

— AG Office Maldives (@AGOmv) July 4, 2022

ތަފާސް ހިސާބުގެ ތަފްސީލަށް ބަލާއިރު، އެއްބަސްވުންތަކާއި ގުޅޭގޮތުން 122 ލަފައެއް ޤަވާއިދުތަކާއި ގުޅޭގޮތުން 81 ޤާނޫނީ ލަފައެއް، އުޞޫލުތަކާއި ގުޅޭގޮތުން 26 ލަފައެއް، މުޢާހަދާތަކާ ގުޅޭގޮތުން 5 ލަފައެއް އަދި ބިލު ތަސްދީޤްކުރުމާއި ގުޅޭގޮތުން 7 ލަފައެއް ވަނީ ދީފައެވެ. އަދި އެހެނިހެން ކަންކަމާއި ގުޅޭގޮތުން 187 ލަފައެއް ދީފައިވެއެވެ.

ބަންޑާރަ ނާއިބުގެ އޮފީހުން ބުނީ މިއަހަރުގެ ފުރަތަމަ 6 މަސް ދުވަހުގެ ތެރޭގައި ލަފާ ދިން މައްސަލަތަކުގެ ތެރޭގައި މިދިޔަ އަހަރު ނިމުނުއިރު ލަފާ ނުދެވިހުރި މައްސަލަތައްވެސް ހިމެނޭކަމަށެވެ.