އެމެރިކާގެ މަޝްހޫރު ލަވަކިޔުންތެރިއާ ރިހާނާ ވިހައިފިއެވެ.

ރޭ ބޭރުގެ މީޑިއާތަކުން ރިޕޯޓުކޮށްފައިވާ ގޮތުގައި ރިހާނާ ވިހާފައިވަނީ މިހިނގާ މެއި މަހުގެ 13 ވަނަ ދުވަހު، އެމެރިކާގެ ލޮސް އެންޖެލިސްގައެވެ. ރިހާނާ އަދި އޭނާގެ ލޯބިވެރިޔާ އޭސެޕް ރޮކީއަށް ލިބުނީ ފިރިހެން ކުއްޖެއްކަމަށްވެސް ރިޕޯޓްތައް ބުނެއެވެ.



ނަމަވެސް އަދި މިދެތަރިންނަށް ލިބުނު ފުރަތަމަ ދަރިފުޅަށް ކިޔާނެ ނަމެއް ހާމަކޮށްފައެއް ނުވެއެވެ.

ލަވަކިޔުންތެރިއާ ރިހާނާ އޭނާގެ ފުރަތަމަ ދަރިއަށް ބަލިވެއިންކަން ހާމަކޮށްފައިވަނީ މިއަހަރުގެ ޖެނުއަރީމަހުގެ 31 ވަނަ ދުވަހުއެވެ. ބަލިވެއިންކަން ހާމަކޮށްފައިވަނީ ނިއުޔޯކް ސިޓީގެ ފިނި މަގުތަކުމަތީގައި ރިހާނާ އޭނާގެ ލޯބިވެރިއާ އޭސެޕް ރޮކީ އާއެކު ކުރިއަށްދިޔަ ފޮޓޯ ޝޫޓެއްގައެވެ.

2003 ވަނަ އަހަރުން ފެށިގެން ލަވަކިއުމުގެ ދާއިރާއިން އެތައް ކާމިޔާބީއެއް ހާސިލުކޮށްފައިވާ ރިހާނާ ވަނީ ހިޕްހޮޕް، އާރްއެންބީ، އަދި ރެގޭ ސްޓައިލްގެ ރީތި މަގުބޫލު ލަވަތަކެއް އާންމުންނަށް ދޫކޮށްލާފައެވެ. އޭނާގެ ލަވަތަކަށް 9 ގްރެމީ އެވަރޑްވެސް ލިބިފައިވެއެވެ. މިހާރު ރިހާނާ އަކީ ލަވަކިއުމުގެ އިތުރުން، ފެޝަން، އަދި ބިއުޓީ ޕްރޮޑަކްޓްސްގެ ވިޔަފާރިވެރިއެއްވެސްމެއެވެ.

2007 ވަނަ އަހަރު ރެޕް ލަވަކިއުމުން ފާހަގަ ކޮށްލެވުނު އޭސެޕް ރޮކީވެސް ވަނީ މަގުބޫލު ލަވަތަކެއް ހުށައަޅައިދީފައެވެ.