މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ކޮންގްރެސްގައި ބައިވެރިވުމުގެ ފުރުސަތު ނުލިބި ތިބި މަންދޫބުންނަށް ރަޖިސްޓަރީވުމަށް އިތުރު ފުރުސަތެއް އެ ޕާޓީން ހުޅުވާލައިފިއެވެ.

މި ހިނގާ އޮކްޓޯބަރު މަހުގެ 1 އިން 3 އަށް ބޭއްވުމަށް ހަމަޖެހިފައިވާ އެމްޑީޕީގެ ކޮންގްރެސްގެ ބައިވެރިން އޮންލައިންކޮށް ރަޖިސްޓަރީ ކުރުމަށް އެންމެ ފުރަތަމަ ދިން ސުންގަޑިއަކީ 25 ސެޕްޓެމްބަރު 2026 އެވެ. ނަމަވެސް، އެ ތާރީޚާ ހަމައަށް ރަޖިސްޓަރީ ނުވެވުމުގެ ސަބަބުން ކޮންގްރެސްގައި ބައިވެރިވުމުގެ ޙައްޤު ގެއްލިފައިވާ ބައެއް ފަރާތްތައް ތިބުމާއެކު، އެ ފަރާތްތަކަށް އަލުން ފުރުސަތު ދިނުމަށް އެމްޑީޕީން މިހާރު ވަނީ ނިންމާފައެވެ.

އެމްޑީޕީން ބުނީ، މިގޮތަށް ނިންމީ ކޮންގްރެސްގައި ބައިވެރިވުމުގެ ޙައްޤު ލިބިފައިވާ ވީހާވެސް ގިނަ ފަރާތްތަކަށް މަންދޫބުންގެ ގޮތުގައި ބައިވެރިވުމުގެ މަގު ފަހިކޮށްދިނުމަކީ ޕާޓީގެ މައިގަނޑު އެއް މަޤްޞަދު ކަމަށްވާތީ ކަމަށެވެ.

މި ނިންމުމާ ގުޅިގެން، ރަޖިސްޓަރީ ނުވެވި ތިބި ފަރާތްތަކަށް 2 އޮކްޓޯބަރު 2026 ވާ ހުކުރު ދުވަހުގެ މެންދުރުފަހު 2:30 އިން ފެށިގެން އެ ރޭގެ 10:00 އާ ހަމައަށް މާލެ ސިޓީ ކައުންސިލްގައި އެކަމަށް ޚާއްޞަކުރެވިފައިވާ މޭޒަށް ވަޑައިގަތުމުން ރަޖިސްޓަރީވުމުގެ އިންތިޒާމު ހަމަޖެހިފައިވާ ކަމަށް އެމްޑީޕީން ވަނީ ބުނެފައެވެ.

ކޮންގްރެސްގެ ތާވަލަށް ބަލާއިރު، އޮކްޓޫބަރު 1 ވަނަ ދުވަހުގެ ރޭ އިފްތިތާހީ ރަސްމިއްޔާތަށްފަހު، ޖެހިގެން އަންނަ ހުކުރު ދުވަހުގެ މެންދުރުފަހުން ފެށިގެން ރޭގަނޑާ ހަމައަށް ކުރިއަށްދާނީ އިންވެސްޓްމަންޓް ފޯރަމެކެވެ. އަދި ހޮނިހިރު ދުވަހުގެ ހެނދުނު 9:00 އިން ފެށިގެން ކޮންގްރެސްގެ ރަސްމީ މަސައްކަތްތައް އޮންނާނެއެވެ. އެގޮތުން ޕާޓީގެ އަސާސީ ގަވާއިދަށް ހުށަހެޅިފައިވާ އިސްލާހުތަކަށް ވޯޓަށް އެހުން ހޮނިހިރު ދުވަހު ކުރިއަށްދާނެ ކަމަށާއި، އަސާސީ ގަވާއިދަށް އަންނަ ބަދަލުތައް އެދުވަހުގެ ރޭގަނޑުގެ ވަގުތެއްގައި ސާފުވެގެންދާނެ ކަމަށް އެމްޑީޕީން ވަނީ ބުނެފައެވެ.