ޅ. ނައިފަރުން 17 އަހަރުގެ ފިރިހެން ކުއްޖަކު ވީނުވީއެއް ނޭނގި ގެއްލިގެން ފުލުހުންނަށް ރިޕޯޓުކުރުމާ ގުޅިގެން، އެ ކުއްޖާ ހޯދުމުގެ މަސައްކަތް ދިވެހި ފުލުހުންގެ ޚިދުމަތުން ފަށައިފިއެވެ.

ފުލުހުން ބުނީ ގެއްލިގެން ހޯދަމުންދަނީ ޅ. ނައިފަރު ނޫކަނޑު، މުޙައްމަދު އަޙްޔާން ޙުސައިން (17އ) އެވެ.

މުޙައްމަދު އަޙްޔާން ޙުސައިން ގެއްލިގެން ނައިފަރު ޕޮލިހަށް ރިޕޯޓުކޮށްފައިވަނީ ސެޕްޓެމްބަރު 28 ވަނަ ދުވަހުގެ ހަވީރު 5:30 އެހައިކަންހާއިރުއެވެ. އާއިލާއިން ފުލުހުންނަށް މައުލޫމާތު ދީފައިވާ ގޮތުގައި އަޙްޔާން އެންމެ ފަހުން ފެނިފައިވަނީ ސެޕްޓެމްބަރު 27 ވަނަ ދުވަހުއެވެ. އޭގެ ފަހުން އޭނާގެ އެއްވެސް ޚަބަރެއް ނުވެގެން ފޯނަށް ގުޅުމުން ޖަވާބު ނުދޭތީ، އާއިލާއިން އޭނާ ހޯދުމަށް ކުރި އެއްވެސް މަސައްކަތުން މިހާތަނަށް ފެނިފައެއް ނުވެއެވެ.

އެހެންކަމުން، މުޙައްމަދު އަޙްޔާން ޙުސައިންއާ ބެހޭ އެއްވެސް މަޢުލޫމާތެއް ލިބިފައިވާ ފަރާތެއް ވާނަމަ، ޅ. ނައިފަރު ޕޮލިސް ސްޓޭޝަންގެ ނަންބަރު 9792187 އަށް ނުވަތަ ފުލުހުންގެ ހޮޓްލައިން ނަންބަރު 3322111 އަށް ގުޅުއްވައި އެ މަޢުލޫމާތެއް ހިއްސާކޮށްދެއްވުމަށް ފުލުހުން ވަނީ އެދިފައެވެ.