ރަސްމާލެއިން ބޮޑު ބައެއް ބޭރުގެ ކުންފުންޏަކަށް ދޭން ސަރުކާރުން ނިންމާފައިވާ ނިންމުމާ ގުޅިގެން، ގައުމުގެ ހިމާޔަތުގައި ތެދުވާންޖެހިއްޖެ ކަމަށް ކުރީގެ ހޯމް މިނިސްޓަރު އަދި އަދާލާތު ޕާޓީގެ ކުރީގެ ރައީސް ޝައިހް އިމްރާން ވިދާޅުވެއްޖެ އެވެ.

އެކްސްގައި ކުރެއްވި ޕޯސްޓެއްގައި ޝައިހް އިމްރާން ވިދާޅުވީ، ރަސްމާލޭގެ 500 ހެކްޓަރުގެ ބިން (ދެބައިކުޅަ އެއްބައި) ޔޫއޭއީގެ އީގަލް ހިލްސް ކުންފުންޏަށް 99 އަހަރަށް ދިނުމަކީ އަޑިނޭނގޭ ނިންމުމެއް ކަމަށެވެ. އަދި ދިވެހީންގެ މިނިވަންކަމަށް ގޮންޖެހުން ކުރިމަތިވި ކޮންމެ ފަހަރަކުވެސް ދިވެހީން އެކަމާ ދެކޮޅަށް ތެދުވެފައިވާކަން ފާހަގަކުރައްވައި މި ހާލަތުގައި ގައުމު ދިފާއުކުރަން ނުކުތުމަށް ޝައިހް އިމްރާން ގޮވާލެއްވި އެވެ.

މީގެއިތުރުން، ރާއްޖޭގެ ފަހުގެ ތާރީހަށް ބަލާއިރު ދީނާއި ގައުމަށް ޣަދަރުވެރިވުމުގެ ނަތީޖާ ރައީސް ޑރ. މުހައްމަދު މުއިއްޒަށް ވެސް ހިތިވާނެ ކަމަށް އިމްރާން ވިދާޅުވި އެވެ.

"ވަކީން ހާއްސަކޮށް މި ރާއްޖޭގެ ފަހުގެ ތާރީހަށް ބަލާލީމާ ރައީސް މުއިއްޒަށް ސާފުވެވަޑައިގަންނަވަންވާނެ އެއްކަމަކީ ދީނާއި ގައުމަށް ޣައްދާރުވެރިވުމުގެ ނަތީޖާ ޚުދު އެމަނިކުފާނަށް ވެސް ހިތިވާނެކަން،" އިމްރާން ވިދާޅުވި އެވެ.