ދިވެހިރާއްޖެއަށް މަސްތުވާތަކެތި އެތެރެކޮށް އޭގެ ވިޔަފާރި ފުޅާދާއިރާއެއްގައި ކުރާ ފަރާތްތަކަށް މަރުގެ އަދަބު ދިނުމަށާއި، ރައީސުލްޖުމްހޫރިއްޔާއަށް ލިބިވަޑައިގަންނަވާ އަފޫޢާންމު ދިނުމުގެ އިޚްތިޔާރު އެފަދަ ކުށްވެރިންނަށް ބޭނުން ނުކުރެވޭ ގޮތަށް ޤާނޫނު އިޞްލާޙުކޮށްފައިވާ ކަމަށް ހޯމްލޭންޑް ސެކިއުރިޓީ އެންޑް ޓެކްނޮލޮޖީ މިނިސްޓަރު ޢަލީ އިޙްސާން ވިދާޅުވެއްޖެއެވެ.

ވެރިކަންކުރާ ޕީއެންސީގެ މަޖިލީހުގައި މަޢުލޫމާތު ދެއްވަމުން މިނިސްޓަރު އިޙްސާން ވިދާޅުވީ، ވޭތުވެދިޔަ ތަނުގައި އިންތިޚާބުތަކާ ދިމާކޮށް މަސްތުވާތަކެތީގެ ކުށްވެރިން ސިޔާސީ ނުފޫޒުން މިނިވަންވާ ސަގާފަތް ހުއްޓުވުމަށްޓަކައި ރައީސުލްޖުމްހޫރިއްޔާ ވަނީ އެމަނިކުފާނުގެ އަތްޕުޅުގައި އޮތް ލުއިދިނުމުގެ ބާރުތައް ޤާނޫނީ ގޮތުން ދޫކޮށްލައްވާފައި ކަމަށެވެ. އަދި ބޮޑެތި ޑްރަގް ވިޔަފާރިވެރިންނަށް އެންމެ ހަރުކަށި އަދަބެއްގެ ގޮތުގައި މަރުގެ އަދަބު ކަނޑައެޅުމަށް މަޖިލީހުގެ އެއްބާރުލުމާއެކު މިހާރު ޤާނޫނަށް ބަދަލު ގެނެސްފައިވާ ކަމަށްވެސް ވިދާޅުވިއެވެ.

މި ސަރުކާރުން މަސްތުވާތަކެއްޗާ ދެކޮޅަށް ކުރަމުންދާ މަސައްކަތްތަކުގެ ތަފާސްހިސާބު ހާމަކުރައްވަމުން މިނިސްޓަރު ވިދާޅުވީ، ހިންގުނު 508 އޮޕަރޭޝަނެއްގެ ތެރެއިން 1.33 ޓަނުގެ މަސްތުވާތަކެތި އަތުލައިގަނެވިފައިވާ ކަމަށެވެ. މިއީ މަގުމަތީގެ އަގުން ބަލާނަމަ ގާތްގަނޑަކަށް 1.4 ބިލިއަން ރުފިޔާގެ ތަކެއްޗެވެ. މީގެއިތުރުން، މި މައްސަލަތަކާ ގުޅުންހުރި މަނީ ލޯންޑަރިންގެ 23 މައްސަލައެއް ތަޙުޤީޤު ކުރަމުންދާއިރު، ރަށްރަށަށް އެތެރެކުރަން އުޅުނު 17،000 އެއްހާ ރާފުޅި އަތުލައިގަނެ، އެތެރެކުރުމުގެ ބައެއް ހުއްދަތައް ވަނީ ބާޠިލުކޮށްފައެވެ.

ފުލުހުންގެ ޚާއްޞަ ޚިދުމަތެއް ޤާއިމުކޮށް، ކާގޯ އަދި ޕޯސްޓް މެދުވެރިކޮށް އެތެރެކުރާ ތަކެތި ބަލައިފާސްކުރުމުގެ ނިޒާމު ވަރުގަދަކޮށް 'ކޮންޓްރޯލްޑް ޑެލިވަރީ' ގެ އެހީގައި އަސްލު ވިޔަފާރިވެރިން ހޯދުމުގެ މަސައްކަތް ފަށާފައިވާކަން ފާހަގަކުރައްވަމުން މިނިސްޓަރު ވިދާޅުވީ، މަސްތުވާތަކެތީގެ މައްސަލައަކީ ޤައުމުގެ އެންމެ ބޮޑު އެއް ގޮންޖެހުން ކަމަށެވެ. ފުލުހުންގެ ރެކޯޑުތައް ދައްކާގޮތުން މި އަހަރުގެ މިހާތަނަށް ރިޕޯޓުކުރި 8،912 މައްސަލައިގެ ތެރެއިން 21.4 އިންސައްތަ (1،903 މައްސަލަ) އަކީ މަސްތުވާތަކެއްޗާ ގުޅުންހުރި މައްސަލަތަކެވެ.

މަސްތުވާތަކެތީގެ ވަބާއިން ދިވެހި މުޖުތަމަޢު ސަލާމަތްކުރުމަށް ސަރުކާރުން މިފަދަ ހަރުދަނާ ފިޔަވަޅުތަކެއް އަޅަމުންދާއިރު، ތަންފީޒީ އިދާރާތަކުން ދަނީ އެތެރެކުރާ ދޮރުތައް ބަންދުކުރުމުގެ އިތުރުން ފަރުވާގެ ނިޒާމުވެސް އިތުރަށް ހަރުދަނާކުރުމަށް މަސައްކަތްކުރަމުންނެވެ. މިގޮތުން، ޤާނޫނަށް ގެނެވުނު އިޞްލާޙުތަކާއި ފުލުހުންގެ އޮޕަރޭޝަންތައް ވަރުގަދަކުރުމަކީ މި ޒަމާންވީ ބޮޑު މައްސަލައަށް ދާއިމީ ޙައްލެއް ހޯދުމަށް އެޅުނު މުހިންމު ބިންގަލެއްގެ ގޮތުގައި ސަރުކާރުން ސިފަކުރެއެވެ.