އެމެރިކާގެ ފަޒާއާ ބެހޭ އިދާރާ (ނާސާ) އިން މާސްއަށް ފޮނުވާފައިވާ "ކިއުރިއޮސިޓީ" ރޯވަރއިން، އެ ކޮކްލައިންގެ ސަތަހައިން މީގެ ކުރިން ފެނިފައިނުވާ ފަދަ ތަފާތު "ހަނީކޯމްބް" ނުވަތަ ކުޅަނދުރު ހީވައިގެ ބައްޓަންތަކެއް އެކުލެވޭ ބޮޑު ސަރަޙައްދެއް ހޯދައިފިއެވެ.

"ވާލޭ ގްރޭންޑޭ" ގެ ނަމުން ނަންދެވިފައިވާ ވާދީއަކުން ފެނުނު މި ބައްޓަންތަކަކީ ވަރަށް ތަރުތީބުން އެކުލެވިގެންވާ ގިނަކޯނި (ޕޮލިގަން) ތަކެކެވެ. މީގެ ކުރިންވެސް މާސްގެ ބައެއް ސަރަޙައްދުތަކުން މިފަދަ ބައްޓަންތައް ފެނިފައިވީ ނަމަވެސް، އެއް ސަރަޙައްދަކުން މިހާ ގިނަ އަދަދަކަށް މިފަދަ ބައްޓަންތައް ފެނުނު މީ ފުރަތަމަ ފަހަރެވެ.

މި ބައްޓަންތައް އުފެދެން މެދުވެރިވި ސީދާ ސަބަބެއް ސައިންސްވެރިންނަށް އަދި މުޅިން ސާފެއް ނުވެއެވެ. ނާސާގެ ޖެޓް ޕްރޮޕަލްޝަން ލެބޯޓަރީގެ ސައިންސްވެރިއެއް ކަމަށްވާ އަޝްވިން ވަސަވާދާ ވިދާޅުވީ، ކިއުރިއޮސިޓީ ރޯވަރުގެ އެހީގައި މާސްގެ ގިނަ އަޖައިބުތަކެއް މީގެ ކުރިން ފެނިފައިވީ ނަމަވެސް، މިފަދަ ބޮޑު ސަރަޙައްދެއްގައި ގުޅިފައިވާ ޕޮލިގަން ބައްޓަންތަކެއް ފެނުމަކީ ސައިންސްވެރިންނަށް ލިބުނު ބޮޑު ހައިރާންކަމެއް ކަމަށެވެ. އަދި މި ބައްޓަންތަކުގެ މިންގަނޑުތަކާއި ކެމިކަލް އެކުލެވުން ބަލައި ދިރާސާކުރަމުންދާ ކަމަށާއި، މީގެ ސަބަބުން ދާދި އަވަހަށް އިތުރު މަޢުލޫމާތުތަކެއް ލިބިގެންދާނެ ކަމަށް އުންމީދުކުރައްވާ ކަމަށްވެސް އޭނާ ފާހަގަކުރެއްވިއެވެ.

މި ފެނުނު ޕޮލިގަންތަކުގެ ބޮޑުމިނުގައި ގާތްގަނޑަކަށް 1.3 އިންޗިއާއި 3 އިންޗި ހުރިއިރު، މި ބައްޓަންތައް ފެތުރިފައިވަނީ "މިރާފްލޯރެސް" ނަމަކަށް ކިޔާ އުސް ފަރުބަދައެއްގެ ވަށައިގެންނެވެ. ސައިންސްވެރިން ލަފާކުރާ ގޮތުގައި މީގެ ކުރިން މާސްއިން ފެނުނު މިފަދަ ބައްޓަންތަކަކީ، އެ ކޮކްލައިންގައި ކުރީޒަމާނުގައި މަޑުފަސްގަނޑު ތެމިފައި ހިކުމުގެ ތެރޭގައި އުފެދުނު ރެނދުތަކެކެވެ. އެއީ މާސްގައި ކުރިން ދިރުން އުފެދުމަށް ބޭނުންވާ މޫސުމީ ބަދަލުތައް އޮތްކަމުގެ ނިޝާނެއް ކަމަށް ބެލެވުނު ނަމަވެސް، މިފަހަރު ފެނުނު ބައްޓަންތަކަކީ ފަސްގަނޑުގެ އަޑިއަށް ބާރުބޮޑުވެ ފެން ބޭރުވުމުގެ ސަބަބުން އުފެދުނު އެއްޗަކަށް ވުންވެސް އެކަށީގެންވެއެވެ.

2012 ވަނަ އަހަރުގެ އޯގަސްޓް މަހު މާސްއަށް ތިރިކުރި ކިއުރިއޮސިޓީ ރޯވަރއަކީ ވޭތުވެދިޔަ 12 އަހަރުގެ ތެރޭގައި އެ ކޮކްލައިނާ ގުޅޭގޮތުން އިންގިލާބީ ގިނަ ހޯދުންތަކެއް ހޯދާފައިވާ އުޅަނދެކެވެ. މީގެ ކުރިން މާސްގައި ކުދި ދިރުންތައް (މައިކްރޯބްސް) އުޅެވޭނެ ފަދަ މާހައުލެއް އޮތްކަމުގެ ހެކިތަކާއި، ސަލްފަރ ކްރިސްޓަލްތަކުގެ އިތުރުން ވިދާ ގާކުނޑިތައްވެސް މި ރޯވަރުން ވަނީ ހޯދައި، ސައިންސްގެ ދުނިޔެއަށް ހާމަކޮށްދީފައެވެ.