އިންޑިއާގެ ކިޔަވާ ކުދިންނާއި ޒުވާނުން އިސްނަގައިގެން ކުރިއަށްގެންދާ "ކޮކްރޯޗް" އިހުތިޖާޖުތައް އިންތިހާއަށް ވަރުގަދަވަމުންދާ މި ދަނޑިވަޅުގައި، އިމްތިހާނު ކަރުދާސް ލީކުކުރުމުގެ މައްސަލަތަކުގައި ހިމެނޭ ފަރާތްތަކަށް ލަސްނުކޮށް ފިޔަވަޅު އެޅުމަށްޓަކައި ޚާއްޞަ ކޯޓުތަކެއް އުފައްދަވާނެ ކަމަށް އިންޑިއާގެ ބޮޑުވަޒީރު ނަރެންދުރަ މޯދީ ވައުދުވެވަޑައިގެންފިއެވެ.

މޯދީ ސޯޝަލް މީޑިއާގައި އާންމުކުރެއްވި ބަޔާނެއްގައި ވިދާޅުވީ، އިންޑިއާގެ ޒުވާނުންގެ މުސްތަގުބަލަކީ ސަރުކާރުން އެންމެ އިސްކަންދޭ ކަންތައް ކަމަށާއި، އެ ކުދިންގެ ކުރިމަގަށް ހުރަސްއަޅާ އެއްވެސް ފަރާތަކަށް ދޫނުދެއްވާނެ ކަމަށެވެ. ނަމަވެސް، މުޒާހަރާގެ ބައިވެރިން ގަބޫލުކުރާ ގޮތުގައި ބޮޑުވަޒީރުގެ މި ނިންމެވުމަކީ މައްސަލައަށް އޮތް އެކަށީގެންވާ ހައްލެއް ނޫނެވެ.

More strict actions against paper leaks to come in tomorrow’s Cabinet! pic.twitter.com/NRysBukk5U

— Narendra Modi (@narendramodi) July 23, 2026

މި ހަރަކާތުގެ ތަރުޖަމާނު ސޯރަވް ދާސް ފާހަގަކުރި ގޮތުގައި، ވޭތުވެދިޔަ އަހަރުތަކުގައި އިމްތިހާނު ކަރުދާސް ލީކުވުމުގެ އެތައް މައްސަލައެއް ފެންމަތިވި ނަމަވެސް، މިހާތަނަށް އެއްވެސް ފަރާތަކަށް ހައްގު އަދަބެއް ދެވިފައެއް ނުވެއެވެ. އެހެންކަމުން، ހަމައެކަނި އަވަސް ކޯޓުތަކެއް އުފެއްދުމުގެ ބަދަލުގައި، ތައުލީމީ ނިޒާމަށް އިންގިލާބީ އިސްލާހީ ބަދަލުތަކެއް ގެނައުމަށާއި، ތައުލީމާ ބެހޭ ވަޒީރު ދަރުމެންދުރަ ޕްރަދާން މަގާމުން އިސްތިއުފާ ދެއްވުމަށް އިހުތިޖާޖުގެ ބައިވެރިން ދަނީ ގޮވާލަމުންނެވެ.

އިންޑިއާގެ ވެރިރަށް ނިއުދިއްލީގެ އިތުރުން މުމްބާއީ، ޗެންނާއީ އަދި ހައިދަރުއާބާދު ފަދަ ބޮޑެތި ސިޓީތަކަށް މި މުޒާހަރާތައް މިހާރު ވަނީ ފެތުރިފައެވެ. އިދިކޮޅު ލީޑަރު ރާހުލް ގާންދީ ވިދާޅުވި ގޮތުގައި، ފާއިތުވި 10 އަހަރުގެ ތެރޭގައި 150 އަށްވުރެ ގިނަ އިމްތިހާނު ކަރުދާސް ލީކުވެފައިވާއިރު، މި ފޭލިވުމުގެ ފުރިހަމަ ޒިންމާ ސަރުކާރުން އުފުލަންޖެހޭނެއެވެ.

ސަރުކާރާއި އިހުތިޖާޖުގެ ބައިވެރިންނާ ދެމެދު ކުރެވުނު މަޝްވަރާތައް ނާކާމިޔާބުވެފައިވާއިރު، ސިޔާސީ މުހައްލިލުން ދެކޭގޮތުގައި މިއީ މޯދީގެ ސަރުކާރަށް ކުރިމަތިވެފައިވާ ވަރަށް ބޮޑު ގޮންޖެހުމެކެވެ. ވަޒީފާނެތް މީހުންގެ އަދަދު އިތުރުވުމާއި ތައުލީމީ ނިޒާމުގައި އޮތް ކޮރަޕްޝަނާ މެދު ރައްޔިތުންގެ މެދުގައި އޮތް ނުތަނަވަސްކަން މިހާރު ވަނީ އިންތިހާއަށް ބޮޑުވެފައެވެ.