ރާއްޖޭގައި ކިޑްނީ ބަދަލުކުރުމުގެ ފުރުސަތު ފަހިކޮށްދިނުމަށް އެކުލަވައިލި "އިންސާނުންގެ ގުނަވަން ޓްރާންސްޕްލާންޓްކުރުމުގެ ބިލު" ތަސްދީގު ނުކުރައްވައި ރައީސުލްޖުމްހޫރިއްޔާ އަނބުރާ ފޮނުވާލުމަކީ، ފުރާނަ ސަލާމަތްކުރަން ހަނގުރާމަކުރާ 300 އަށް ވުރެ ގިނަ ބަލިމީހުންގެ އުންމީދުތައް ފުނޑުފުނޑުކޮށްލުން ކަމަށް ގަލޮޅު އުތުރު ދާއިރާގެ މެމްބަރު އިބްރާހީމް މުހައްމަދު (ކުޑޫ) ވިދާޅުވެއްޖެއެވެ.

މިއަދު މަޖިލީހުގައި ބޭއްވި ބަހުސްގައި ކުޑޫ ވަނީ ސަރުކާރުގެ މި ނިންމުމަށް ވަރަށް ހަރުކަށި އިބާރާތުން ފާޑުވިދާޅުވެފައެވެ. އޭނާ ފާހަގަކުރެއްވި ގޮތުގައި، މާލެ ސަރަހައްދުގެ ތިން ހޮސްޕިޓަލެއްގައި ކިޑްނީ ޓްރާންސްޕްލާންޓްގެ ފަރުވާ ފެށުމަށް ހުރަހަކަށްވީ، ހަތް މަސް ދުވަހުގެ ބުރަ މަސައްކަތުން ފާސްކުރި ބިލު ސަރުކާރުން ހިފެހެއްޓުމަށްފަހު އަނބުރާ ފޮނުވާލުމެވެ.

ކުޑޫ ވިދާޅުވީ، މި ބިލަކީ ސަރުކާރުގެ އިސްވެރިންނާ މަޝްވަރާކޮށް، އެ ފަރާތްތަކުގެ ރުހުމާއި ތާއީދާ އެކު ކުރިއަށް ގެންދިޔަ މަސައްކަތެއް ކަމަށެވެ. ނަމަވެސް، ހުރިހާ މަރުހަލާއެއް ނިމުމުން ބިލު ބޭރުކޮށްލުމަކީ ރައްޔިތުންގެ އިހުސާސްތަކަށް ބެލުމެއް ނެތި ކުރި ކަމެއް ކަމަށް އޭނާ ސިފަކުރެއްވިއެވެ.

"އަޅުގަނޑުމެން ކޮންމެ ދުވަހަކު މިތަނަށް ތެދުވެ މި ބުނަނީ ރައްޔިތުންގެ އިހުސާސްތައް އެނގެޔޭ. އެކަމަކު ޑަޔަލިސިސްގައި ތިބި 300 އެއްހާ މީހުންގެ ހާލަތަށް ބަލާއިރު، އެ ބުނާ އަޅާލުމެއް ނުފެނުނު،" ކުޑޫ ވިދާޅުވިއެވެ.

މެމްބަރު އިތުރަށް ވިދާޅުވީ، ސަރުކާރު ހިންގާ ޕީއެންސީގެ ސުޕަރ މެޖޯރިޓީ މަޖިލީހުގައި އޮތްއިރު، މިފަދަ މުހިންމު ސިއްހީ ބިލަކަށް އިހުމާލުވުމަކީ ބަލިމީހުންގެ އާއިލާތަކަށް ޖަވާބުދާރީވާންޖެހޭނެ ކަމެއް ކަމަށެވެ.

މި ބިލަކީ ރާއްޖޭގައި ގުނަވަން ހަދިޔާކުރުމުގެ ގާނޫނީ އޮނިގަނޑު ހަރުދަނާކޮށް، ބޭރު ގައުމުތަކަށް ބަރޯސާނުވެ ފަރުވާ ލިބޭނެ މަގު ފަހިކޮށްދިނުމަށް ހުށަހެޅި ބިލެކެވެ. ނަމަވެސް ރައީސް ޑރ. މުއިއްޒު ބިލު އަނބުރާ ފޮނުއްވީ އޭގައި އިސްލާހުކުރަންޖެހޭ ބައެއް ކަންކަން ހުރި ކަމަށް ބަޔާންކުރައްވައެވެ.