ފިލިޕިންސްއަށް މިފަހުން އައި ބިންހެލުމުގެ ސަބަބުން، ގެއްލުންވި ޢިމާރާތްތައް މަރާމާތުކުރުމުގެ އިތުރުން، އެ ހާދިސާގެ ސަބަބުން އާންމުންގެ ނަފްސާނީ ދުޅަހެޔޮކަމަށާއި އިޤްތިޞާދަށް ކުރަމުންދާ ނޭދެވޭ އަސަރުތައް ދަނީ އިތުރުވަމުންނެވެ.

އިންޓަރނޭޝަނަލް ފެޑެރޭޝަން އޮފް ރެޑް ކްރޮސް އެންޑް ރެޑް ކްރެސެންޓް ސޮސައިޓީސް (އައި.އެފް.އާރް.ސީ) ގެ ފަރާތުން ޑްރޫ ސްޓްރޯބެލް ފާހަގަކުރެއްވި ގޮތުގައި، ބިންހެލުމުގެ ސަބަބުން ކުރިމަތިވެފައިވާ ނަފްސާނީ މައްސަލަތައް، ޚާއްޞަކޮށް ކުޑަކުދިންގެ މެދުގައި ދަނީ ވަރަށް ބޮޑަށް ފާހަގަކުރެވެމުންނެވެ.

"މިފަދަ ބިންހެލުމެއްގެ ސަބަބުން މީހުންގެ، ޚާއްޞަކޮށް ކުޑަކުދިންގެ ނަފްސާނީ ދުޅަހެޔޮކަމަށް ކުރާ އަސަރު އަޅުގަނޑުމެންނަށް ވަޒަންކޮށްނުލެވޭހާ ބޮޑު. މި ހާދިސާގެ ސަބަބުން ގިނަ ބަޔަކަށް ބޮޑެތި ނަފްސާނީ ހާސްކަމެއް ލިބިފައިވާކަން މިހާރުވެސް ދަނީ ފެންނަމުން،" ސްޓްރޯބެލް ވިދާޅުވިއެވެ.

ބިންހެލުން އައީ ކިޔެވުން ފެށުމުގެ ކުރިން ކަމަށްވީ ނަމަވެސް، ހެނދުނުގެ އެސެމްބްލީއަށް ދަރިވަރުން ބޭރުގައި ތިއްބާ ސްކޫލް އިމާރާތްތަކަށް ލޮޅުންއަރާ މަންޒަރު ފެނުމުން ގިނަ ދަރިވަރުންނަށް ވަނީ ބިރުވެރިކަމާއި ނުތަނަވަސްކަން ކުރިމަތިވެފައެވެ.

ކަމާބެހޭ އިދާރާތަކުން ހާމަކޮށްފައިވާ ގޮތުގައި، މި ހާދިސާގައި 10 ސްކޫލަކަށް އެކިވަރުގެ ގެއްލުންތައް ލިބިފައިވެއެވެ. އަދި ސްކޫލްތަކުގެ ރައްކާތެރިކަން ކަށަވަރުކުރުމަށްޓަކައި އިންޖިނިއަރުން ކުރިއަށްގެންދާ ސާވޭތަކާ ގުޅިގެން، ގާތްގަނޑަކަށް 6،000 އެއްހައި ސްކޫލް ވަގުތީ ގޮތުން ވަނީ ބަންދުކޮށްފައެވެ.

ރެޑް ކްރޮސްއިން ދަނީ އިންސާނީ އެހީތެރިކަން ފޯރުކޮށްދިނުމުގެ ގޮތުން ނަފްސާނީ އެހީތެރިކަމާއި، ހޫނު ކާތަކެތި ފޯރުކޮށްދިނުމުގެ އިތުރުން މީހުން ސަލާމަތްކުރުމުގެ މަސައްކަތުގައި ބައިވެރިވަމުންނެވެ. މީގެ އިތުރުން، މި ކާރިސާގެ ސަބަބުން އާމްދަނީ ހޯދުމަށް ކުރާ މަސައްކަތްތަކަށް ކުރާނެ އަސަރުތައްވެސް އެ ޖަމްޢިއްޔާއިން ދަނީ ދިރާސާކުރަމުންނެވެ. ކުރިއަށް އޮތް މަސްތަކުގައި ފަތުރުވެރިކަން ދަށަށް ދިއުމުގެ ސަބަބުން ވަޒީފާގެ ފުރުޞަތުތަކަށް ހުރަސް އެޅިދާނެ ކަމުގެ އިންޒާރު ކަމާބެހޭ ފަރާތްތަކުން ދެއެވެ.

އާންމު ހާލަތަށް ރުޖޫޢަވުމަށް ކުރާ މަސައްކަތްތަކަށް މޫސުމީ ބަދަލުތަކުގެ ސަބަބުން އިތުރު ގޮންޖެހުންތަކެއް ކުރިމަތިވެދާނެ ކަމަށް މާހިރުން ލަފާކުރެއެވެ. އެގޮތުން 'އެލް ނީނިއޯ' އާއި ހުޅަނގު މޫސުމުގެ ސަބަބުން ފެންބޮޑުވުމާއި ނުވަތަ ހަނަފަސްވުން ފަދަ ކަންކަން ކުރިމަތިވެ، ހާލުގައި ޖެހިފައިވާ ފަރާތްތަކަށް އިތުރު ތަކުލީފުތަކާ ކުރިމަތިލާން ޖެހިދާނެއެވެ.

މި ސަރަޙައްދުގެ ދަނޑުވެރިކަމަށް ލިބިދާނެ ގެއްލުންތަކަކީވެސް ބޮޑު ކަންބޮޑުވުމެކެވެ. މިއީ ފިލިޕީންސްގައި އެންމެ ފުޅާދާއިރާއެއްގައި ހަނޑޫ ހައްދާ އެއް ސަރަޙައްދަށް ވާއިރު، ސަރަންގަނީ ފަދަ ރަށްތަކުގެ އެތައް ހާސް އާއިލާއެއް ބަރޯސާވަނީ ކާށި ދަނޑުވެރިކަމަށެވެ. މޫސުމަށް އަންނަ ބަދަލުތަކާއި ބިންހެލުމުގެ ސަބަބުން އުމްރާނީ ވަސީލަތްތަކަށް ލިބުނު ގެއްލުންތަކުގެ ސަބަބުން ދަނޑުވެރިކަމުގެ އުފެއްދުންތެރިކަން ދަށަށް ގޮސް، އާއިލާތަކުގެ އާމްދަނީއަށް ނޭދެވޭ އަސަރުކޮށްފާނެ ކަމުގެ ބިރު އެބައޮތެވެ.

"މިއީ އާންމުންގެ މައިގަނޑު އާމްދަނީ ލިބޭ ވަސީލަތްތައް. މޫސުމީ ގޮންޖެހުންތަކާއި، ބިންހެލުމުގެ ސަބަބުން އުމްރާނީ ވަސީލަތްތަކަށް ލިބިފައިވާ ގެއްލުންތަކާ އެކު، ކުރިމަތިވެދާނެ ދަތި ހާލަތަކަށް އަޅުގަނޑުމެން މިދަނީ ތައްޔާރުވަމުން،" ފިލިޕީންސްގެ ސަރުކާރުގެ ފަރާތުނެ ވާހަކަ ދެއްކި ސޮސްމޭނާ ވިދާޅުވިއެވެ.

ގެދޮރާއި، ސްކޫލްތަކާއި ވިޔަފާރިތައް އަލުން އާރާސްތުކުރުމުގެ މަސައްކަތް ކުރަމުންދާއިރު، މިއީ ގިނަ ދުވަސްތަކެއް ނަގާނެ އުނދަގޫ މަރުހަލާއެއްކަން ކަމާބެހޭ ފަރާތްތަކުން ގަބޫލުކުރެއެވެ. ސޮސްމޭނާ އިތުރަށް ވިދާޅުވީ، ބިންހެލުމަށްފަހު އަލުން ދިރިއުޅުން އާރާސްތުކުރުމަކީ ފަސޭހަ ކަމެއް ނޫން ކަމަށެވެ.