ކިއުބާގެ ހުޅަނގު އުތުރު އައްސޭރިފަށަށް ޖޫން 8، 2026 ވަނަ ދުވަހު 6.1 މެގްނިޓިއުޑްގެ ބާރުގަދަ ބިންހެލުމެއް އަތުވެއްޖެއެވެ. ޔޫއެސް ޖިއޮލޮޖިކަލް ސާވޭ އިން ހާމަކުރި ގޮތުގައި މި ބިންހެލުން އުފެދުނީ ކިއުބާގެ މަންތުއާ އާ 104 ކިލޯމީޓަރު ދުރުން ކަނޑުގެ 10 ކިލޯމީޓަރު އަޑިންނެވެ.

މި ހާދިސާއާ ގުޅިގެން ގެއްލުންތަކެއް ލިބުނު ކަމުގެ އެއްވެސް ރިޕޯޓެއް އަދި މިހާތަނަށް ލިބިފައެއް ނުވެއެވެ.

މި ބިންހެލުމުގެ އަސަރު ކިއުބާގެ ހުޅަނގު ސަރަހައްދުތަކުގެ އިތުރުން، އެމެރިކާގެ ފްލޮރިޑާއާ ހަމައަށް ވެސް ވަނީ އިހުސާސް ކުރެވިފައެވެ.

ފްލޮރިޑާގެ ދެކުނު ހުޅަނގު ސަރަހައްދުތަކުގައި ބިންގަނޑު ތުރުތުރުލި ކަމުގެ ރިޕޯޓުތައް ލިބިފައިވާއިރު، މިޔާމީގެ ބައެއް އިމާރާތްތައް ހުސްކޮށް، ރެއިލްވޭ ޚިދުމަތްތައް ވެސް ވަގުތީ ގޮތުން މެދުކަނޑާލަން ޖެހުނެވެ.

މީގެ އިތުރުން މެކްސިކޯގެ ކަންކޫން ފަދަ ފަތުރުވެރިން ގިނަ ސަރަހައްދުތަކުގައި ވެސް ބިންހެލުމުގެ އަސަރު އިހުސާސް ކުރެވިފައިވެއެވެ.

މި ބިންހެލުމަކީ މި ސަރަހައްދަށް ބަލާއިރު، ވަރަށް ނާދިރު ހާދިސާއެއް ކަމަށް ތަޖުރިބާކާރުން ފާހަގަކުރެއެވެ. ޚާއްސަކޮށް މެކްސިކޯގެ އުތުރުކަނޑު ސަރަހައްދުގައި މިފަދަ ބާރުގަދަ ބިންހެލުމެއް ހިނގުމަކީ ވަރަށް މަދުން ނޫނީ ނުފެންނަ ކަމެއް ކަމަށް ސައިންސްވެރިން ބުނަމުންދާއިރު، ކަމާބެހޭ އިދާރާތަކުން ވަނީ މި ބިންހެލުމާ ގުޅިގެން ސުނާމީގެ ނުރައްކަލެއް ނެތްކަން ކަށަވަރުކޮށްދީފައެވެ.