"އަދަދު" ނޫހުގެ ވެބްސައިޓުގައި ރޭގެ ވަގުތެއްގައި ޝާއިއުކުރި ޚަބަރަކާ ގުޅިގެން، ކޯޓުގެ ހުރުމަތް ކަނޑާފައިވާ ކަމަށް ތުހުމަތުކޮށް އެ މައްސަލަ ބަލަން ކޯޓުން ވަނީ ފަށާފައެވެ.

މި މައްސަލައާ ގުޅިގެން "އަދަދު" ނޫހުގެ ނޫސްވެރިޔާ ލީވާން އަލީ ނާސިރު މާދަމާ ހެނދުނު 11:00 އަށް ކޯޓަށް ހާޒިރުވުމަށް މިހާރު ވަނީ އަމުރުކޮށްފައެވެ.

މި މައްސަލަ ބަލަން ފަށާފައިވަނީ ލީވާންގެ ނަމުގައި ޝާއިއުކޮށްފައިވާ އެ ޚަބަރުގައި ކޯޓުގެ ކަރާމާތަށް އުނިކަންލިބޭ ފަދަ ވާހަކަތަކެއް ހުރި ކަމަށް ބަލައިގެންނެވެ.

މީގެ ކުރިން ވެސް ނޫސްވެރިން ލިޔާ ބައެއް ލިޔުންތަކާ ގުޅިގެން ކޯޓުގެ ހުރުމަތް ކެނޑިގެން މައްސަލަތަކެއް ފެންމަތިވެފައިވާއިރު، މިފަހަރުގެ މި މައްސަލައިގައި ކޯޓުން ވަނީ އަވަސް ފިޔަވަޅުތަކެއް އަޅަން ނިންމާފައެވެ.

މި މައްސަލައާ ގުޅިގެން "އަދަދު" ނޫހުން އަދި ރަސްމީކޮށް ވަކި އެއްޗެއް ބުނެފައި ނުވި ނަމަވެސް، މިއީ ނޫސްވެރިކަމުގެ މިނިވަންކަމަށް ހުރަސް އެޅޭ ފަދަ ކަމެއްގެ ގޮތުގައި ބައެއް ފަރާތްތަކުން ދަނީ ސިފަކުރަމުންނެވެ.