ޑޮކިއުމެންޓްރީއާ ގުޅިގެން 'އަދަދު' ނޫހުގެ އޮފީސް ފުލުހުން ބަލާފާސްކޮށްފައިވާތީ، ނޫސްވެރިންނަށް އަމާޒުކޮށް ޖިނާއީ ގާނޫނުތައް ބޭނުންކުރުން ހުއްޓާލުމަށް ޓްރާންސްޕޭރަންސީ މޯލްޑިވްސް އިން ސަރުކާރަށް ގޮވާލައިފިއެވެ.

އެ ޖަމިއްޔާ އިން ނެރުނު ބަޔާނެއްގައި ބުނީ، މީޑިއާގެ ދާއިރާގައި މަސައްކަތްކުރާ ފަރާތްތަކުގެ މައްޗަށް މިހާރު އުފުލާފައިވާ ދައުވާތައް އަނބުރާ ގެންދަންޖެހޭ ކަމަށާއި، މަދަނީ އުސޫލުތަކުން ހައްލުކުރެވެން ހުރި މައްސަލަތަކުގައި ޖިނާއީ އިޖުރާއާތްތައް ބޭނުންކުރުމަކީ ނޫސްވެރިކަމުގެ މިނިވަންކަމަށް އޮތް ބޮޑު ނުރައްކަލެއް ކަމަށެވެ.

ގާނޫނުއަސާސީގެ 28 ވަނަ މާއްދާއާ ހަވާލާދީ ޓްރާންސްޕޭރަންސީ އިން ފާހަގަކުރީ، އެއްވެސް ނޫސްވެރިއަކަށް އެމީހެއްގެ މައުލޫމާތުގެ މަސްދަރު ހާމަކުރުމަށް މަޖުބޫރު ނުކުރެވޭނެ ކަމަށެވެ

ނަމަވެސް 'އަދަދު' ނޫހުގެ ނޫސްވެރިން ގެންގުޅޭ އިލެކްޓްރޯނިކް ސާމާނު ފުލުހުންގެ ބެލުމުގެ ދަށަށް ގެންދިއުމުގެ ސަބަބުން، މަސްދަރުތަކުގެ ސިއްރުކަން ގެއްލުމުގެ ބިރު އިންތިހާއަށް އެބައޮތް ކަމަށް އެ ޖަމިއްޔާ އިން ބުންޏެވެ.

މީޑިއާ ރެގިއުލޭޓް ކުރުމުގެ އަސްލު ބޭނުމަކީ ޒިންމާދާރު ނޫސްވެރިކަމެއް ކުރިއެރުވުން ކަމަށްވާއިރު، ކަނޑައެޅިފައިވާ މަދަނީ އުސޫލުތަކުން ބޭރުވުމަކީ ބަލައިގަނެވޭނެ ކަމެއް ނޫން ކަމަށްވެސް ބަޔާނުގައިވެއެވެ.

މީގެ އިތުރުން، ހިފަހައްޓާފައިވާ ނޫސްވެރިކަމުގެ ހުރިހާ އާލާތްތަކެއް ވަގުތުން ދޫކޮށްލުމަށާއި، އޮފީސް ބަލާފާސްކުރުމުގައި އަމަލުކޮށްފައިވާ ގޮތުގެ ގާނޫނީ ސައްހަކަން ކަށަވަރުކުރުމަށް ޓްރާންސްޕޭރަންސީ އިން ވަނީ އިލްތިމާސްކޮށްފައެވެ.

ފަހަކަށް އައިސް ރާއްޖޭގައި ނޫސްވެރިކަމާއި، ޚިޔާލު ފާޅުކުރުމާއި، އެއްވެ އުޅުމުގެ މިނިވަންކަމަށް ހުރަސްއެޅޭ ފަދަ ކަންކަން ތަކުރާރުވަމުންދާތީ އެ ޖަމިއްޔާ އިން ވަނީ ކަންބޮޑުވުން ފާޅުކޮށްފައެވެ.