ދުނިޔޭގެ ޓެކްނޮލޮޖީ ބާޒާރުގައި މިހާތަނަށް ނެރޭ އެންމެ އަގުހެޔޮ ފަތްޖަހާލެވޭ ފޯނު "ނޯވާ ފްލިޕް" ތައާރަފުކޮށްފިއެވެ. "އޭއައި ޕްލަސް +" އިން އުފައްދާފައިވާ މި ފޯނުގެ އަގަކީ އެންމެ 320 ޑޮލަރު (4،935 ރުފިޔާ) އެވެ. މިއީ މަޝްހޫރު އެޕަލް ވޮޗަކަށްވުރެ ވެސް ހެޔޮ އަގެކެވެ.

2020 ވަނަ އަހަރު މޮޓޮރޯލާ އިން "ރޭޒަރ" ފޯނު ފަތްޖަހާލެވޭ ގޮތަށް އަލުން ބާޒާރަށް ނެރުމާ ގުޅިގެން، ފޯނު ފަރުމާކުރުމުގެ އާ އިންގިލާބެއް ފެށުނެވެ. އޭގެ ފަސް އަހަރު ފަހުން ސެމްސަންގް، މޮޓޮރޯލާ، އޮޕޯ އަދި އޮނަރ ފަދަ ކުންފުނިތަކުން 800 އާއި 1،200 ޑޮލަރާ ދެމެދުގެ އަގުތަކެއްގައި ފޯނުތައް ވިއްކަމުންދާއިރު، "އޭއައި ޕްލަސް +" އިން މިވަނީ އާންމުންނަށް އަތްފޯރާ ފަށުގައި މިފަދަ ފޯނެއް ތަޖުރިބާކޮށްލުމުގެ ފުރުސަތު ހުޅުވާލާފައެވެ.

އިންޑިއާގެ ބާޒާރަށް "ނޯވާ 2" ސީރީޒްއާ އެކު 2026 ވަނަ އަހަރުގެ އެޕްރީލް މަހު ތައާރަފުކުރި "ނޯވާ ފްލިޕް" ގެ އަގަކީ 29،999 ރޫޕީސް (4،934 ރުފިޔާ) އެވެ. މި ފޯނުގެ މައިގަނޑު ސިފަތަކަށް ބަލާއިރު، 6.9 އިންޗީގެ އެމޯލެޑް އެތެރޭ ޑިސްޕްލޭއަކާއި، 3.1 އިންޗީގެ ބޭރު ސްކްރީނެއް ހިމެނެއެވެ. ފޯނު ހިންގުމަށް ބޭނުންކޮށްފައިވަނީ މީޑިއާޓެކް ޑިމެންސިޓީ 7300 ޕްރޮސެސަރެކެވެ. މީގެ އިތުރުން 8 ޖީބީގެ ރޭމް އަދި 256 ޖީބީގެ މެމޯރީއާއެކު، 50 މެގަޕިކްސެލްގެ މައި ކެމެރާއަކާއި 32 މެގަޕިކްސެލްގެ ކުރީ ކެމެރާއެއް މި ފޯނުގައި ހިމެނެއެވެ.

މި ފޯނުގެ އެންމެ ފާހަގަކޮށްލެވޭ އެއް ފީޗާއަކީ އޭގެ ބެޓެރީއެވެ. 4325 އެމްއޭއެޗްގެ ބެޓެރީއެއް ހިމަނާފައިވާއިރު، މިއީ ސެމްސަންގް ގެލެކްސީ ޒެޑް ފްލިޕް 6 ފަދަ އަގުބޮޑު ފޯނުތަކަށްވުރެ ވެސް ބޮޑު ބެޓެރީއެކެވެ. ފޯނުގައި 33 ވޮޓްގެ ޗާޖިންގ، 5ޖީ، އެންއެފްސީ އަދި ފެނާއި ހިރަފުހުން ރައްކާތެރިކޮށްދޭ އައިޕީ64 ރޭޓިންގް ހިމެނެއެވެ.

ފޯނުގެ ޕާފޯމަންސަށް ބަލާއިރު މިއީ މެދު ފަންތީގެ ފޯނެކެވެ. ޑިމެންސިޓީ 7300 ޕްރޮސެސަރަކީ އާންމު ކަންކަމަށް ރަނގަޅު އެއްޗަކަށް ވިޔަސް، އެންމެ މަތީ ފަންތީގެ ޗިޕްތަކާ އަޅާބަލާއިރު ކެމެރާގެ މަސައްކަތްތަކުގައާއި ބަރު މަސައްކަތްތަކުގައި ފަރަގު ފެންނާނެއެވެ. ނަމަވެސް، މިހާ ހެޔޮ އަގެއްގައި އައިޕީ64 ރޭޓިންގް ފަދަ ވަސީލަތްތައް ހިމެނުމަކީ ލިބޭ ވަރަށް ބޮޑު ކުރިއެރުމެކެވެ.

ޓެކް ދާއިރާގެ މާހިރުން ދެކޭގޮތުގައި "ނޯވާ ފްލިޕް" ވެގެންދާނީ ފަތްޖަހާލެވޭ ފޯނުތައް އާންމުކޮށްދޭނެ އިންގިލާބީ ފޯނަކަށެވެ. "ގްލޭސިއަރ ވައިޓް" ކުލައިގެ މި ފޯނު ބާޒާރަށް ނެރުމަށް ހަމަޖެހިފައިވަނީ 2026 ވަނަ އަހަރުގެ މެއި މަހުއެވެ. މީގެ ސަބަބުން ކުރިއަށް އޮތް ތަނުގައި އަގުހެޔޮކޮށް ފަތްޖަހާލެވޭ ފޯނުތައް ބާޒާރުގައި އާންމުވެގެންދާނެ ކަމަށް ބެލެވެއެވެ.