ބޭންކް އޮފް މޯލްޑިވްސް (ބީއެމްއެލް) ގެ ޔޫއެސް ޑޮލަރުގެ މާލީ ހާލަތާއި، ބޭންކުގެ ނެޓް އޯޕަން ޕޮޒިޝަން (އެންއޯޕީ) އަދި ޑޮލަރުގެ ލިކުއިޑިޓީ ވަރަށް ހަރުދަނާ މިންވަރެއްގައި ބެހެއްޓިފައިވާ ކަމުގެ ޔަގީންކަން އެ ބޭންކުން ދީފިއެވެ.

ބޭންކުން ވަނީ ފައިނޭންޝަލް މި ދެ ކޮންސެޕްޓްގެ ތަފާތު އޮޅުންފިލުވައިދީ، ބޭންކުގެ މާލީ ދުޅަހެޔޮކަމާ މެދު ކަސްޓަމަރުންނަށް އިތުބާރު އަރުވާފައެވެ. ބޭންކުން ހާމަކުރި ގޮތުގައި، ނެޓް އޯޕަން ޕޮޒިޝަނަކީ ވަކި ވަގުތެއްގައި ބޭންކުގެ ބޭރު ފައިސާގެ އެސެޓްތަކާއި ލައިބިލިޓީތަކުގެ ދެމެދުގައި ހުންނަ ތަފާތެވެ. މިއީ ބޭންކުގައި ބޭރު ފައިސާ ވިއްކުމުގެ ގާބިލުކަން ހުރި މިންވަރާއި، އެކްސްޗޭންޖް ރޭޓަށް އަންނަ ބަދަލުތަކުން ވެދާނެ ފައިދާ ނުވަތަ ގެއްލުން ވަޒަންކުރާ މިންގަނޑެކެވެ. ނަމަވެސް، މިއީ ބޭންކުން ޔޫއެސް ޑޮލަރު ދޫކުރުމުގެ ގާބިލުކަން އަންގައިދޭ މިންގަނޑެއް ނޫނެވެ.

ލިކުއިޑިޓީއަކީ ކަސްޓަމަރުން ފައިސާ ނެގުމާއި، ބޭރަށް ފައިސާ ފޮނުވުމާއި، ލޯނު ދޫކުރުން ފަދަ ކުރު މުއްދަތުގެ ޒިންމާތައް އަދާކުރުމަށް ބޭންކަށް ލިބިފައިވާ ގާބިލުކަމެވެ. ބީއެމްއެލް އިން ފާހަގަކުރި ގޮތުގައި މި ދެ މިންގަނޑަކީ ވެސް މާލީ ރިސްކް ވަޒަންކުރުމުގައި މުހިންމު ދެ މިންގަނޑެވެ.

ބޭންކުގެ ތަފާސްހިސާބުތަކަށް ބަލާއިރު، 2020 ވަނަ އަހަރުގެ ޑިސެމްބަރުން ފެށިގެން ބޭންކުގެ އެންއޯޕީ ހުރީ ދަށް މިންވަރެއްގައެވެ. އަދި 2024 ވަނަ އަހަރުގެ ސެޕްޓެމްބަރު މަހު ބޭންކުގެ ޔޫއެސް ޑޮލަރުގެ އެންއޯޕީ %20- އަށް (ޝޯޓް ޕޮޒިޝަނަކަށް) ވެއްޓުނެވެ. މިއީ އެ މުއްދަތުގައި ބޭންކުން ގާތްގަނޑަކަށް 200 މިލިއަން ޔޫއެސް ޑޮލަރު އިތުރަށް ވިއްކާފައިވުމުން ދިމާވި ހާލަތެކެވެ. ނަމަވެސް، މިއީ ބޭންކުގެ ލިކުއިޑިޓީއަށް އައި ބަދަލެއް ނޫން ކަމަށާއި، ކަސްޓަމަރުންނަށް ފައިސާ ދޫކުރުމުގެ ގާބިލުކަން ބޭންކުގައި އެ ވަގުތުވެސް ހުރި ކަމަށް ބޭންކުން ބުނެއެވެ.

މި މައްސަލަ ހައްލުކުރުމަށް މިނިސްޓްރީ އޮފް ފައިނޭންސް އެންޑް ޕްލޭނިންގްގެ އެހީތެރިކަމާއެކު ކުރެވުނު މަސައްކަތުން، 2025 ވަނަ އަހަރުގެ ސެޕްޓެމްބަރު މަހު އެންއޯޕީ ވަނީ 'ލޯންގް ޕޮޒިޝަން' އަކަށް ބަދަލުކުރެވިފައެވެ. މިހާރުވެސް މި މިންގަނޑު ހުރީ ރެގިއުލޭޓަރީ މިންގަނޑުތަކަށްވުރެ މާ ރަނގަޅު ހާލަތެއްގައެވެ. މީގެ އިތުރުން، މިދިޔަ އަހަރު ތެރޭގައި ޓީޓީ ހެދުމާއި ކާޑުގެ ބޭނުންތަކަށް ޖުމްލަ 600 މިލިއަން ޑޮލަރަށްވުރެ ގިނަ ޔޫއެސް ޑޮލަރު ބޭންކުން ވަނީ ވިއްކާފައެވެ.

ފަތުރުވެރިކަމުގެ ސިނާއަތަށް ބަލާއިރު، 2024 އިން ފެށިގެން މިހާތަނަށް އަލަށް 365 މިލިއަން ޔޫއެސް ޑޮލަރުގެ ލޯނު ދޫކޮށްފައިވެއެވެ. އަދި 2026 ވަނަ އަހަރުގެ ފުރަތަމަ ކުއާޓަރުގެ ނިޔަލަށް ފަތުރުވެރިކަމުގެ ދާއިރާގެ ބޭންކުގެ ނެޓް ލޯން ޕޯޓްފޯލިއޯ 585 މިލިއަން ޔޫއެސް ޑޮލަރަށް އަރާނެއެވެ.

28 މާރޗް 2026 ގައި ބޭއްވުނު އަހަރީ އާންމު ޖަލްސާގައި ބޭންކުގެ ސީއީއޯ އަދި މެނޭޖިންގ ޑައިރެކްޓަރ މުޙައްމަދު ޝަރީފް ވިދާޅުވީ، ބޭންކުގެ 43 އަހަރުވީ ތާރީޚުގައި ނުދެކޭ ފަދަ ރެކޯޑް ނަތީޖާތަކެއް މިދިޔަ އަހަރު ހޯދާފައިވާ ކަމަށެވެ. މިއީ ހަރުދަނާ ކެޕިޓަލް އަދި ލިކުއިޑިޓީ ރޭޝިއޯތަކެއްގެ ސަބަބުން ލިބުނު ކާމިޔާބީއެއްކަން އޭނާ ފާހަގަކުރެއްވިއެވެ.

ބޭންކް އޮފް މޯލްޑިވްސް އިން ވަނީ ކަސްޓަމަރުންނާއި ހިއްސާދާރުންގެ އިތުބާރު ދެމެހެއްޓުމަށްޓަކައި ދެފުށް ފެންނަ، ހަރުދަނާ މާލީ މެނޭޖްމަންޓެއް ކުރިއަށް ގެންދާނެ ކަމުގެ ފުރިހަމަ ޔަގީންކަން ދީފައެވެ.