މާލޭގައި ތޫނު އެއްޗެއް ބޭނުންކޮށްގެން މާރާމާރީ ހިންގި މައްސަލައެއްގައި ދަޢުވާލިބޭ މީހަކު 7 އަހަރު ދުވަހުގެ މުއްދަތަށް ޖަލަށްލުމަށް ކްރިމިނަލް ކޯޓުން ހުކުމް ކޮށްފިއެވެ.

މި މައްސަލައިގައި ދައުލަތުން ދަޢުވާ އުފުލާފައިވަނީ ގދ. ގައްދޫ، ޖަނބުރޯޒްގަސްދޮށުގެ، މުޙައްމަދު ޝަފީޤުގެ މައްޗަށެވެ. އޭނާގެ މައްޗަށް ދަޢުވާކޮށްފައިވަނީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ ދަށުން، ތޫނު އެއްޗެއް ނުވަތަ ނުރައްކާތެރި ހަތިޔާރެއް ބޭނުންކޮށްގެން މާރާމާރީ ހިންގުމުގެ ކުށުގައެވެ.

މި ހާދިސާ ހިނގާފައިވަނީ 2023 ފެބުރުވަރީ 14 ވަނަ ދުވަހުގެ މެންދުރުފަހު 15:30 ހާއިރު، މާލޭގެ ވިލިމާލެ ފެރީ ޓާމިނަލް ކައިރީގައެވެ. މުޙައްމަދު ޝަފީޤު ވަނީ އެ ސަރަޙައްދުގައި މީހަކަށް ތޫނު އެއްޗަކުން ހަމަލާދީ ޒަހަމްކޮށްލާފައެވެ.

މި މައްސަލައިގެ އިބްތިދާއީ އަޑުއެހުންތަކުގައި ޝަފީޤު ވަނީ އޭނާގެ މައްޗަށް ކުރި ދަޢުވާއަށް އިންކާރުކޮށްފައެވެ. އޭނާ ބުނެފައިވަނީ ހާދިސާ ހިނގި ވަގުތު އެ ސަރަޙައްދުގައި އޭނާ ނުހުންނާނެ ކަމަށެވެ. އަދި އޭނާގެ ދިފާއުގައި ހެކިވެސް ހުށަހަޅާފައިވެއެވެ. ނަމަވެސް، މައްސަލައިގެ ޝަރީޢަތް ނިމުމަކާ ގާތްވެ، ޚުލާސާ ބަޔާން ހުށަހެޅުމަށް ދިން ފުރުޞަތުގައި އޭނާ ވަނީ ކުށަށް އިޢުތިރާފުވެފައެވެ.

ކްރިމިނަލް ކޯޓުން ކުރި ޙުކުމުގައި ބުނެފައިވަނީ، މައްސަލައިގައި ހުށަހެޅިފައިވާ ހެކިތަކަށާއި ޤާނޫނީ ބަހުސްތަކަށް ބަލާއިރު، ތޫނު އެއްޗެއް ބޭނުންކޮށްގެން މާރާމާރީ ހިންގިކަމުގެ ކުށް މުޙައްމަދު ޝަފީޤުގެ މައްޗަށް ސާބިތުވާ ކަމަށެވެ.

އެހެންކަމުން، މި ކުށުގެ އުގޫބާތެއްގެ ގޮތުން ޝަފީޤު 7 އަހަރު ދުވަހުގެ މުއްދަތަށް ޖަލަށްލުމަށް ކޯޓުން ވަނީ ކަނޑައަޅާފައެވެ. ނަމަވެސް، މި މައްސަލައިގެ ޝަރީޢަތް ނިމެންދެން އޭނާ ބަންދުގައި ހުރި މުއްދަތު ޙުކުމުގެ މުއްދަތުން އުނިކުރުމުން، އޭނާ މިހާރު ތަންފީޒުކުރަންޖެހޭނީ 4 އަހަރު ދުވަހުގެ ޖަލު ޙުކުމެކެވެ.