އައްޑޫ ފޭދޫ ބަނދަރު ބޭރުގައި އަޅާފައި އޮއްވާ މިއަދު އަލިފާން ރޯވި ޑައިވިން ދޯނި ފެތިފައިވާކަމަށް އެމްއެންޑީއެފުން އިން ބުނެފިއެވެ.

އެމްއެންޑީއެފުން ބުނީ، މައިނާ ސަފާރީގެ ޑައިވިން ދޯނީގައި ރޯވިކަމުގެ ރިޕޯޓް މިއަދު މެންދުރު ފަހު ލިބުމާ އެކު، އަލިފާން ނިއްވުމުގައި ސަދަން އޭރިއާ ކޮމާންޑު، އައްޑޫ ހިތަދޫ ފަޔާ ސްޓޭޝަންގެ ފަޔާފައިޓަރުން ހަރަކާތްތެރިވި ކަމަށެވެ.

އަލިފާން ނިއްވުމުގެ މަސައްކަތް ކުރަމުން ދަނިކޮށް މެންދުރު ފަހު 3:30 ހާއިރު އެ ދޯނި ކަނޑ އަޑިއަށް ގޮސްފައިވާ ކަމަށް އެމްއެންޑީއެފުން މައުލޫމާތުދެއެވެ.

އެމްއެންޑީއެފުން ބުނީ އެ ހާދިސާގައި އެކެއްގެ ފައި ފިހިގެން ފޭދޫ ސިއްހީ މަރުކަޒުގައި ފަރުވާ ދިނުމަށް ފަހު، މިހާރު ދޫކޮށްލާފައިވާ ކަމަށެވެ.

ޑައިވިން ދޯނީގައި އަލިފާން ރޯވުމުން އެ ވަގުތު ދޯނީގައި ތިބި މީހުން އެރީ އެ ދޯނި ކައިރީގައި އޮތް ސަފާރީއަކަށް ކަމަށް އެމްއެންޑީއެފުން ވަނީ ބުނެފައެވެ.

މިހާދިސާ ހިނގަން މެދުވެރިވި ސަބަބެއް އެމްއެންޑީއެފް އިން ހާމައެއް ނުކުރެއެވެެ.