މާލޭގެ މަގަކުން ދުއްވާފައި ދިޔަ ސައިކަލެއްގައި ގަސްދުގައި ޕިކަޕަކުން ޖެއްސި ކަމަށް ތުހުމަތު ކުރެވޭ މައްސަލައެއްގައި ހައްޔަރުކުރި މީހާގެ ބަންދަށް ކޯޓުން ފަސް ދުވަސް އިތުރުކޮށްފިއެވެ.

މި މައްސަލައާ ގުޅިގެން ފުލުހުން ހައްޔަރުކޮށްފައިވަނީ އުމުރުން 60 އަހަރުގެ ދިވެހި ފިރިހެނެކެވެ. އޭނާ ހައްޔަރުކޮށްފައިވަނީ މިދިޔަ ބުދަ ދުވަހުއެވެ. ހައްޔަރުކުރި މީހާގެ ބަންދާމެދު ގޮތެއް ނިންމުމަށް އިއްޔެ ކޯޓަށް ހާޒިރުކުރުމުން، ކޯޓުން ވަނީ އޭނާ ފަސް ދުވަހަށް ބަންދުގައި ބެހެއްޓުމަށް އަމުރުކޮށްފައެވެ.

ކޯޓުގެ ބަންދު އަމުރުގައިވާ ތަފްސީލުތަކަށް ބަލާއިރު، މި ހާދިސާ ހިނގާފައިވަނީ އޭނާ ދުއްވަމުން ދިޔަ ޕިކަޕް ކުއްލިއަކަށް ސައިކަލް ލޭނާ ދިމާލަށް އަނބުރާލައި، ދުއްވާފައި ދިޔަ ސައިކަލެއްގައި ގަސްތުގައި ޖެއްސުމުންނެވެ. މި އެކްސިޑެންޓުގެ ސަބަބުން ސައިކަލް ދުއްވަން އިން މީހާއަށް އެކިވަރުގެ އަނިޔާ ލިބިފައިވާ ކަމަށް ފުލުހުންނާ ހަވާލާދީ ބަންދު އަމުރުގައި ބަޔާންކޮށްފައިވެއެވެ.

މި މައްސަލައިގައި ހައްޔަރުކުރި މީހާގެ މައްޗަށް ފުލުހުން ކުރަނީ ނުރައްކާތެރިކޮށް އެއްގަމު އުޅަނދު ދުއްވައިގެން އެކްސިޑެންޓެއް ހިނގުމުގެ ތުހުމަތެވެ.

މި އެކްސިޑެންޓް ހިނގަން މެދުވެރިވި ސަބަބާއި، ގަސްތުގައި ޖެއްސި ކަމަށް ބުނާ މައްސަލައިގެ ތަފްސީލުތައް ހޯދުމުގެ މަސައްކަތް ފުލުހުން ދަނީ ކުރަމުންނެވެ.