ކަނޑުމަގުން ވަގަށް ރާއްޖެ އެތެރެކުރަން އުޅުނު 99،000 ސިނގިރޭޓު މޯލްޑިވްސް ކަސްޓަމްސް ސާވިސްއިން އަތުލައިގަނެފިއެވެ.

ކަސްޓަމްސުން މިއަދު ބުނީ، މި ތަކެތި އަތުލައިގަނެފައިވަނީ މި ނޮވެމްބަރު މަހުގެ 5 ވަނަ ދުވަހު މާލޭ ކޮމާޝަލް ހާބަރުން ކަމަށެވެ. އެގޮތުން އަތުލައިގަތް ސިނގިރޭޓްގެ ޖުމްލަ އަދަދަކީ 99،000 ކަމަށް ކަސްޓަމްސް އިން މަޢުލޫމާތު ދީފައިވެއެވެ. ނަމަވެސް މިކަމުގެ އިތުރު ތަފްސީލް ކަސްޓަމްސުން ދީފައެއް ނުވެއެވެ.

ދުންފަތުގެ އިސްތިއުމާލުކުރުން ހުއްޓުވުމަށް ސަރުކާރުން ވަރުގަދަ ފިޔަވަޅުތަކެއް އަޅަމުންދާ މި ދަނޑިވަޅުގައި، ދާޚިލީ ސަލާމަތާ ފަންނިއްޔާތާ ބެހޭ ވަޒީރު ޢަލީ އިޙުސާން ދާދިފަހުން ވިދާޅުވެފައިވަނީ، ފާއިތުވި ދޮޅުމަހެއްހާ ދުވަހުގެ ތެރޭގައި އެކަނިވެސް 7،000 ވޭޕް ސްޓިކާއި ދެ މިލިއަން ސިނގިރޭޓު އަތުލައިގަނެވިފައިވާ ކަމަށެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ވަނީ ރާއްޖޭގައި ވޭޕް ކުރުން މަނާކޮށް، ސިނގިރޭޓުން ނަގާ ޓެކްސް ވެސް ބޮޑުކޮށްފައެވެ. މީގެ އިތުރުން، ދުންފަތުން ދުރު ޖީލެއް ބިނާކުރުމަށްޓަކައި "ޖެނަރޭޝަނަލް ބޭން" ތަންފީޒުކޮށް، 1 ޖެނުއަރީ 2007 އިން ފެށިގެން އުފަންވާ ކުދިންނަށް ދުންފަތުގެ ބާވަތްތައް ވިއްކުމާއި ބޭނުންކުރުން ވަނީ މަނާކޮށްފައެވެ.

އޭގެއިތުރުން ކަނޑުމަގުންނާއި ވައިގެމަގުން ރާއްޖެއަށް ގަވާއިދާ ޚިލާފަށް ސިނގިރޭޓާއި ވޭޕް އެތެރެކުރުން ހުއްޓުވުމަށް ކަސްޓަމްސްއިން އަންނަނީ ޚާއްޞަ މަސައްކަތްތަކެއް ކުރަމުންނެވެ.