މާލޭގެ މަޖީދީ މަގުގައި ހުންނަ ޒިކުރާ މިސްކިތުގެ ބިމުގައި މިހާރު ހަދާފައިވާ ވަގުތީ އިމާރާތް ތަޅާލައި، އެ ތަނުގައި ޒަމާނީ ބޮޑު މިސްކިތެއް ބިނާކުރުމަށް ސަރުކާރުން ނިންމައިފިއެވެ.

އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އިއްޔެ ވިދާޅުވީ، މި މަޝްރޫޢު ކުރިއަށް ގެންދިއުމަށްޓަކައި ބޭނުންވާ ދީލަތި އެހީ މިހާރު ހަމަޖެހިފައިވާ ކަމަށެވެ. އަދި އެހީދިން ފަރާތްތަކުން އެދިފައިވަނީ މި ހިނގާ ރަމަޟާން މަހުގެ 27 ވިލޭރޭ މިސްކިތުގެ ބިންގާ އެޅުމަށް ކަމަށްވެސް މިނިސްޓަރު ވިދާޅުވިއެވެ.

ޒިކުރާ މިސްކިތުގެ ބިމުގައި ވަގުތީ މިސްކިތެއް ހުޅުވައި ބޭނުންކުރަން ފަށާފައިވަނީ 2021 ވަނަ އަހަރުއެވެ. މިނިސްޓަރު ވިދާޅުވީ ރަމަޟާން މަސް ނިމުމާއެކު މިހާރު ހުރި ވަގުތީ އިމާރާތް ތަޅާލުމުގެ އަމަލީ މަސައްކަތް ފެށޭނެ ކަމަށެވެ.

ޒިކުރާ މިސްކިތަކީ ކުރީގެ ރައީސް މައުމޫން އަބްދުލްގައްޔޫމްގެ ބައްޕާފުޅުގެ ހަނދާނުގައި ބިނާކޮށްފައިވާ މިސްކިތެކެވެ. އެ މިސްކިތް ތަޅާލުމަށްފަހު، "ދާރުލް ޒިކުރާ" ގެ ނަމުގައި 10 ބުރީގެ އިމާރާތެއް އެޅުމަށް 2018 ވަނަ އަހަރު ރައީސް ޔާމީންގެ ސަރުކާރުން އެސްޖޭ ކޮންސްޓްރަކްޝަނާ ހަވާލުކުރިއެވެ. ނަމަވެސް، 130 މިލިއަން ރުފިޔާގެ އެ އެއްބަސްވުން ފަހުން ބާތިލުކުރުމާ ގުޅިގެން ކޯޓު މަރުހަލާތަކެއް ކުރިއަށް ދިޔައެވެ.

އެ މައްސަލަ ކޯޓުން ބޭރުން ހައްލުކުރީ، އެސްޖޭ ކުންފުންޏަށް ދީފައިވާ 30 މިލިއަން ރުފިޔާގެ ބަދަލުގައި، އެ ކުންފުނީގެ ސީއެސްއާރުގެ ދަށުން ހުޅުމާލެ ދެވަނަ ފިޔަވަހީގައި މިސްކިތެއް ބިނާކޮށްދޭ ގޮތަށް އެއްބަސްވުމަކަށް އައުމަށްފަހުއެވެ. ނަމަވެސް އެއްބަސްވިތާ ދެ އަހަރު ވެގެންދިޔައިރުވެސް ހުޅުމާލޭގެ އެ މިސްކިތުގެ މަސައްކަތް ނިމިފައެއް ނުވެއެވެ.