ފިރިމީހާ ނުވަތަ އަނބިމީހާގެ ނަމުގައި ބޯހިޔާވަހިކަމެއް އޮތް ނަމަވެސް، ސަރުކާރުން އަލަށް ފަށާ ބޯހިޔާވަހިކަމުގެ މަޝްރޫޢުގެ ދަށުން ގޯއްޗަށް ކުރިމަތިލުމުގެ ފުރުސަތު ދިނުމަށް ނިންމައި އެކަން އިޢުލާނުކޮށްފިއެވެ.

އިމާރާތްކުރުމާއި، ގެދޮރުވެރިކަމާއި ބިނާރާ ބެހޭ ވުޒާރާއިން މިކަމާ ގުޅޭ އުސޫލު މިހާރު ވަނީ ސަރުކާރުގެ ގެޒެޓުގައި އާންމުކޮށްފައެވެ. މި އުސޫލުގެ ދަށުން ގޯއްޗަށް އެދި ހުށަހެޅުމުގެ ފުރުސަތު މި މަހުގެ އަށްވަނަ ދުވަހުން ފެށިގެން ރަސްމީކޮށް ހުޅުވާލާނެއެވެ.

މި އުސޫލަށް ބަދަލު ގެނައުމަށް ނިންމެވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މާލޭގެ ރައްޔިތުންނާ އެކު ބޭއްވެވި ބައްދަލުވުންތަކުގައި، ގިނަ ބަޔަކު އެކަމަށް އެދި ހުށަހަޅާފައިވާތީ ރައްޔިތުންގެ އެދުމުގެ މަތިންނެވެ. ހައުސިން މިނިސްޓަރު ޑރ. ޢަބްދުﷲ މުއްތަލިބު ވިދާޅުވީ، "ގޯތި ގެދޮރު"ގެ ނަމުގައި އާ ސްކީމެއް ތަޢާރަފު ކުރަން ނިންމީ ގޯތި ހޯދުމަށް އިތުރު ފުރުސަތުތަކެއް ފަހިކޮށްދިނުމުގެ މަގުސަދުގައި ކަމަށެވެ.

މި ބަދަލާއެކު، ކައިވެނިކޮށްގެން އުޅޭ މީހުންގެ ތެރެއިން އެކެއްގެ ނަމުގައި ފްލެޓެއް ނުވަތަ ބޯހިޔާވަހިކަމެއް އޮތް ނަމަވެސް، އަނެކާއަށް މުސްތަޤުބަލުގައި އަމިއްލަ ބިމެއް ހޯދުމުގެ ފުރުސަތު ލިބިގެންދާނެއެވެ.

މި އުސޫލުގެ ދަށުން ގޯތި ދޫކުރުމަށް ހަމަޖެހިފައިވަނީ ދެ ކެޓަގަރީއަކަށް ބަހާލައިގެންނެވެ. އެއީ މާލޭ ރަށްވެހިންނަށް ގްރޭޓާ މާލެ ސަރަހައްދުންނާއި، ރަސްމާލެއިންނެވެ. އަދި މާލޭގައި ދިރިއުޅޭ އެހެން ރަށްރަށުގެ ރަށްވެހިންނަށް ގޯތި ދޫކުރުމަށް ހަމަޖެހިފައިވަނީ ރަސްމާލެއިންނެވެ.

ހައުސިން މިނިސްޓްރީގެ ތަފާސް ހިސާބުތައް ދައްކާ ގޮތުން، މި ސްކީމްގެ ދަށުން މިހާތަނަށް އެކި މަރުހަލާތަކުގައި ޖުމްލަ 18،399 އެޕްލިކޭޝަނެއް އެބައޮތެވެ. މީގެ ތެރޭގައި ފްލެޓަށް އެދި ހުށަހެޅުމުގެ މަރުހަލާގައި ހުރި 8،466 ފޯމާއި، ހުށަހަޅާފައިވާ 3،396 ފޯމު ހިމެނެއެވެ. އަދި ގޯއްޗަށް އެދި ހުށަހެޅުމުގެ މަރުހަލާގައި 2،851 ފޯމު އޮތްއިރު، 2،513 ފޯމެއް ވަނީ ހުށަހަޅާފައެވެ. މީގެ އިތުރުން ހިޔާ ކެޓަގަރީން ވެސް ގިނަ އަދަދެއްގެ އެޕްލިކޭޝަންތައް ދަނީ ޕްރޮސެސް ކުރެވެމުންނެވެ.

މި މަޝްރޫޢުގެ ދަށުން ގޯއްޗަށް އެދި ފޯމު ހުށަހަޅަން ޖެހޭނީ ސަރުކާރުގެ "ބޯހިޔާވަހިކަން" ޕޯޓަލް މެދުވެރިކޮށް އޮންލައިންކޮށެވެ.