މާލޭގެ މަގުތަކުގައި އުޅޭ ބުޅާތަކުގެ މައްސަލައަށް ދާއިމީ ހައްލެއް ހޯދުމަށް ހުޅުމާލޭގައި ގާއިމުކޮށްފައިވާ 'އޮޅުހިޔާ' ފެސިލިޓީއަށް މިހާތަނަށް 352 ބުޅާ ގެންގޮސްފައިވާ ކަމަށް އެނިމަލް ވެލްފެއާ މިނިސްޓްރީން ހާމަކޮށްފިއެވެ.

2024 ނޮވެންބަރު މަހު ހުޅުވި މި ފެސިލިޓީގައި މިހާރު ވަނީ ވެޓެރިނަރީ ކްލިނިކްގެ މަސައްކަތް ފަށައި، ބުޅާތައް ނިއުޓަރ ކުރުމުގެ އޮޕަރޭޝަންތައް ކުރިއަށް ގެންދަން ފަށާފައެވެ. އެ މިނިސްޓްރީން މައުލޫމާތު ދޭ ގޮތުގައި، މިހާތަނަށް 60 ބުޅާ ނިއުޓަރ ކުރެވިފައިވާއިރު، އޭގެ ތެރޭގައި ހިމެނޭ 5 އަންހެން ބުޅަލެއް ވަނީ ސްޕޭކުރެވިފައެވެ.

މާލޭގެ އެކި ސަރަހައްދުތަކުގައި ދިރިއުޅޭ ބުޅާތައް މި ފެސިލިޓީއަށް ބަދަލުކުރުމުގެ މަސައްކަތް މާލޭ ސިޓީ ކައުންސިލުން ފެށީ 2024 ވަނަ އަހަރުގެ ޑިސެންބަރު މަހުގައެވެ. ނަމަވެސް، 2025 ފެބްރުއަރީ މަހުގެ 27 ވަނަ ދުވަހު މިނިސްޓްރީން މި ފެސިލިޓީއާ ރަސްމީކޮށް ހަވާލުވުމަށްފަހު، މަގުތަކުން ބުޅާ ނަގައިގެން އޮޅުހިޔާއަށް ގެންދިއުމުގެ މަސައްކަތް ވަނީ އިތުރަށް ހަލުވިކޮށްފައެވެ. މާލޭ ސިޓީ ކައުންސިލުން މި ފެސިލިޓީ މިނިސްޓްރީއާ ހަވާލުކުރީ އެތަން ހެދުމަށް ހިނގި ހަރަދު ދޭ ގޮތަށް އެއްބަސްވެގެންނެވެ.

އެނިމަލް ވެލްފެއާ މިނިސްޓްރީން ބުނީ ފެސިލިޓީއަށް މަދުވާ ބައެއް ސާމާނުތަކާއި ބުޅާ ބަހައްޓާނެ ކޮށިތައް ރަނގަޅުކުރުމުގެ މަސައްކަތް މިހާރުވެސް ކުރިއަށްދާ ކަމަށެވެ.

'އޮޅުހިޔާ' ފެސިލިޓީއަކީ ބުޅާތަކަށް ބޭނުންވާ ފުރިހަމަ ހިދުމަތްތަކާއެކު ތަރައްގީކޮށްފައިވާ ތަނެކެވެ. އެގޮތުން، ބުޅާތައް ކަރަންޓީނު ކުރާނެ ސަރަހައްދަކާއި، ޒަމާނީ ކްލިނިކަކާއި، ލެބޯޓްރީއެއްގެ އިތުރުން، ބުޅާތަކަށް ބޭނުންވާ ބޭސް ލިބޭނެ ފާމަސީއެއްވެސް އެތަނުގައި ގާއިމުކޮށްފައިވެއެވެ. މީގެއިތުރުން، ބުޅާތައް މިނިވަންކަމާއެކު އުޅެވޭނެ ހާއްސަ ސަރަހައްދެއްވެސް މި ފެސިލިޓީގައި ވަނީ ތައްޔާރުކޮށްފައެވެ.

މި މަޝްރޫއަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން، މާލޭގެ މަގުތަކަކީ އަމާން އަދި ސާފުތާހިރު ތަނަކަށް ހެދުމަށް ކުރިއަށްގެންދާ މުހިންމު މަސައްކަތެކެވެ.