ފަހަކަށް އައިސް ރައީސް ޑރ. މުޙައްމަދު މުޢިއްޒުގެ ސަރުކާރުން ވޭޕް މަނާކުރުމަށް ނިންމި ނިންމުމާއެކު، އޭގެ ނޭދެވޭ އަސަރު މުޖުތަމަޢުން ފެންނަން ފަށާފައިވާ ކަމަށް ބުނެ ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ.

ޚާއްޞަކޮށް، ދުންފަތުގެ އިސްތިޢުމާލުކުރުން ހުއްޓުވުމުގެ ނަމުގައި ގެނައި މި ކުއްލި ބަދަލުގެ ސަބަބުން، ވޭޕް ބޭނުންކުރަމުން ދިޔަ ގިނަ އަދަދެއްގެ ޒުވާނުން އަލުން ސިނގިރޭޓް ބުއިމަށް މަޖުބޫރުވެ، ދުންފަތަށް އޮތް ދެވިހިފުން އިތުރަށް ވަރުގަދަވެފައިވާ ކަމަށް ފާހަގަކުރެވެއެވެ. ސަރުކާރުގެ މި ސިޔާސަތަކީ އެކަށީގެންވާ ދިރާސާއެއް ނެތި، އަދި އިތުރު ގޮތްތަކެއް ދައްކައިނުދީ ނިންމާފައިވާ ނިންމުމެއް ކަމަށް ބުނެ ފާޑުކިޔުންތައް އަމާޒުވަމުންދާއިރު، މިކަމުގެ ސަބަބުން ޢާންމު ޞިއްޙަތަށް ކުރާނެ ގެއްލުން ކުރިއަށްވުރެ ބޮޑުވެދާނެ ކަމުގެ ބިރު ވަނީ ހީވެފައެވެ.

މީގެ އިތުރުން، މި ނިންމުމުގެ ނަތީޖާއެއްގެ ގޮތުން ޒުވާނުންގެ ތެރޭގައި އިތުރު ނުރައްކާތެރި އާދަތަކެއް އަށަގަންނަމުންދާކަން ވަނީ ފާހަގަކުރެވިފައެވެ. އެގޮތުން، ބާޒާރުން ލިބެން ހުރި ތަކެތި ބޭނުންކޮށްގެން އަމިއްލައަށް ބިޑި އުފައްދައިގެން ބޭނުންކުރުން ޒުވާނުންގެ މެދުގައި އާންމުވަމުންދާ ކަމުގެ ޝަކުވާތައް ދަނީ އިތުރުވަމުންނެވެ. ސިނގިރޭޓާއި ވޭޕް ފަދަ ތަކެތި ހޯދުމަށް ހުރި ހުރަސްތަކާއެކު، ރައްކާތެރިކަމުގެ އެއްވެސް މިންގަނޑެއް ނެތް ގޮތަށް އަމިއްލައަށް ތައްޔާރުކުރާ މިފަދަ ބިޑިތައް ބޭނުންކުރުމަކީ ޒުވާނުންގެ ފުއްޕާމެޔަށާއި މުޅި ޞިއްޙަތަށް ކުރިއަށްވުރެ ބޮޑު ނުރައްކަލެއް ކުރިމަތިވާނެ ކަމެކެވެ.

ސަރުކާރުގެ މި ނިންމުމަކީ ހަޤީޤީ މައްސަލައަށް ޙައްލެއް ހޯދުމުގެ ބަދަލުގައި، ހަމައެކަނި ދެއްކުންތެރިކަމުގެ ސިޔާސަތެއްގެ ގޮތުގައި ގިނަ ބަޔަކު ސިފަކުރެއެވެ. ދުނިޔޭގެ އެހެން ޤައުމުތަކުގައި ވޭޕް ބޭނުންކުރަނީ ސިނގިރޭޓާ ދުރުވުމަށް އެހީތެރިވެދޭ ވަސީލަތެއްގެ ގޮތުގައި ކަމަށްވީ ނަމަވެސް، ރާއްޖޭގައި އެއްވެސް އިންތިޒާމެއް ނެތި މިތަކެތި މަނާކުރުމުން ކަޅު ބާޒާރުގައި ސިނގިރޭޓުގެ ވިޔަފާރި ފުޅާވެ، ޒުވާނުން ނުރައްކާތެރި ބިޑި ފަދަ ތަކެއްޗަށް އަހުލުވެރިވުމަކީ ޤައުމުގެ މުސްތަޤުބަލަށް އޮތް ބޮޑު ގޮންޖެހުމެއް ކަމުގައި ދަނީ ބުނަމުންނެވެ.

އެހެންކަމުން ވޭޕް މަނާކުރުމުން ހެޔޮނަތީޖާ އެއް ނުފެނި ގިނަ ޒުވާނުންތަކެއް ވަނީ ދުންފަތަށް އަހުލުވެރިވެފައެވެ.