ޓެކްނޮލޮޖީގެ ދުނިޔޭގައި ބޮޑު މަގުބޫލުކަމެއް ހޯދާފައިވާ އެޕަލް ކުންފުނިން، އެ ކުންފުނީގެ ފުރަތަމަ ފޯލްޑަބަލް އައިފޯން ބާޒާރަށް ނެރުމަށް ކުރަމުންދާ މަސައްކަތްތައް އާ ހަރުފަތަކަށް ޖައްސާލައިފިއެވެ. އެގޮތުން މިދިޔަ ދެތިން އަހަރު ދުވަހުގެ ތެރޭގައި އެޕަލްގެ ޑިޒައިން ޓީމުން ވަނީ މި ފޯނު ފުރިހަމަ ކުރުމަށްޓަކައި ރެޔާއި ދުވާލު ބުރަ މަސައްކަތްތަކެއް ކޮށްފައެވެ.

އެޕަލްގެ އިންޖިނޭރުންގެ މައިގަނޑު އަމާޒަކީ މިހާރު ބާޒާރުގައި ހުރި ފޯލްޑަބަލް ފޯނުތަކަށްވުރެ ގިނަ ދުވަހު ގެންގުޅެވޭނެ، ފެންވަރުގެ ގޮތުން ވަރުގަދަ އަދި ޓެކްނިކަލް ގޮތުން ފުރިހަމަ އުފެއްދުމެއް ކަސްޓަމަރުންނަށް ފޯރުކޮށްދިނުމެވެ. މިގޮތުން، އެޕަލް އިން ވިސްނަމުންދަނީ ފޯނުގެ އެތެރެ އާއި ބޭރުގެ ޑިސްޕްލޭ ތަފާތު އަދި ރައްކާތެރި ގޮތަކަށް ފަރުމާކުރުމަށެވެ.

ޚަބަރުތައް ބުނާގޮތުން، އެހެން ފޯލްޑަބަލް ފޯނުތަކެކޭ އެއްފަދައިން އެޕަލް އިން ވެސް ބޭނުންކުރާނީ "އަލްޓްރާ ތިން" ބިއްލޫރި ކަމަށެވެ. ނަމަވެސް، ސެމްސަންގް ފަދަ ކުންފުނިތަކުން ބޭނުންކުރާ ޕީއީޓީ ފިލްމް ލޭޔަރުގެ ސަބަބުން ސްކްރީންގައި ކޫރު އެޅުމުގެ މައްސަލަ ދިމާވާތީ، އެޕަލް އިން ދަނީ އެކަމަށް ހައްލެއް ހޯދަމުންނެވެ. އެގޮތުން ޑިސްޕްލޭގެ ތެރެއަށް އިތުރު "ޓްރާންސްޕޭރެންޓް ޕޮލިއިމައިޑް" (ޕީއައި) ފިލްމް ލޭޔަރެއް ލުމަށް ދަނީ ޓެސްޓް ކުރަމުންނެވެ. ޕީއައި ފިލްމަކީ އަގުބޮޑު އެއްޗަކަށް ވީނަމަވެސް، މިއީ ސްކްރީންގެ ހަރުކަށިކަން އިތުރުކޮށްދީ ކޫރު އެޅުމުން ރައްކާތެރިކޮށްދޭނެ ފިލްމެކެވެ.

އެޕަލް އިން މިފަދަ ފޯނެއް ނެރުމަށް ގިނަ ވަގުތު ނަގަމުންދަނީ، މީގެ ކުރިން ސެމްސަންގް ގެލެކްސީ ފޯލްޑް ފޯން ފުރަތަމަ ނެރުނުއިރު ދިމާވި ފަދަ މައްސަލަތަކުން ސަލާމަތްވުމަށެވެ. ސެމްސަންގްގެ ފުރަތަމަ ފޯލްޑަބަލް ފޯނަށް ކުނި ހަރުލުމާއި ސްކްރީންގެ ހުޅުތަކަށް ދިމާވި މައްސަލަތަކުގެ ސަބަބުން ބޮޑެތި ގޮންޖެހުންތަކެއް ކުރިމަތިވިއެވެ. އެޕަލްގެ އަމާޒަކީ އެފަދަ އެއްވެސް އުނިކަމެއް ނެތް ފުރިހަމަ އުފެއްދުމެއް ބާޒާރަށް ނެރުމެވެ.

ސްކްރީނަށް ދެވޭ މި ވަރުގަދަ ރައްކާތެރިކަމުގެ ސަބަބުން، އެޕަލްގެ ފުރަތަމަ ފޯލްޑަބަލް ފޯނަށް ބޮޑު ތަރުހީބެއް ލިބޭނެ ކަމަށް މާހިރުން އުންމީދު ކުރެއެވެ. ބެލެވޭ ގޮތުގައި އެޕަލްގެ ސީއީއޯ ވަނީ މިއަހަރުގެ ތެރޭގައި މި އިންގިލާބީ ފޯނު ކަސްޓަމަރުންނާ ހަމައަށް ގެނެސްދިނުމަށް ވަރަށް ބޮޑަށް އިސްކަން ދެއްވާފައެވެ.