ބޭންކު އޮފް މޯލްޑިވްސް (ބީއެމްއެލް) ގެ ސީއީއޯ މަގާމުން އިސްތިއުފާ ދެއްވުމަށް ފިޝަރީޒް މިނިސްޓަރު އަޙުމަދު ޝިޔާމް މިރޭ ގޮވާލައްވައިފިއެވެ.

ޕީއެންސީ ހަރުގޭގައި މިރޭ ބޭއްވި ޖަލްސާގައި ވާހަކަ ދައްކަވަމުން ފިޝަރީޒް މިނިސްޓަރު އަޙްމަދު ޝިޔާމް ވިދާޅުވީ ބީއެމްއެލްގެ ސީއީއޯ މަގާމުން އިސްތިއުފާ ދޭންޖެހޭ ކަމަށެވެ. ޝިޔާމް ވިދާޅުވީ އިއްޔެ ގެންނަން އުޅުނީ މާލީ ބަޣާވާތެއް ކަމަށާއި ބޭންކުގެ ބޯޑުގައި މިހާރު ތިބީ އެ ބަޣާވާތުގެ ބައިވެރިން ކަމަށާއި އެބޭފުޅުން ބޯޑުގައި ތިއްބަވަން ނުޖެހޭ ކަމަށެވެ.

"އަޅުގަނޑު ދެކޭގޮތުގައި މިއަދު ބޭންކު އޮފް މޯލްޑިވިސްގެ ސީއީއޯ ޖެހޭނީ އިސްތިއުފާ ދޭން، މިހާބޮޑު ދެރައެއް މިހާބޮޑު ގެއްލުމެއް ދިވެހި ގައުމާއި ދިވެހި ރައްޔިތުންނަށް ދޭން މަސައްކަތް ކުރި ފަރާތަކަށް މިއަދު ބޭންކު އޮފް މޯލްޑިވްސްގެ އެންމެ މަތީ މަގާމުގައި ހުރެވޭނެ ކަމަށް އަޅުގަނޑު ގަބޫލެއް ނުކުރަން،" ޝިޔާމް ވިދާޅުވިއެވެ.