ހއ. ހޯރަފުށީގައި ދުއްވާފައި ދިޔަ ސައިކަލެއްގެ ފުރޮޅު ފަޅައިގެން ގޮސް ހިނގި ނުރައްކާތެރި އެކްސިޑެންޓެއްގައި ދެ މީހަކަށް ސީރިއަސް އަނިޔާތަކެއް ލިބިއްޖެއެވެ.

މި ހާދިސާއާ ގުޅޭގޮތުން ރަސްއޮންލައިން އަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ، އެކްސިޑެންޓް ހިނގާފައިވަނީ ސެޕްޓެމްބަރު 26 ވަނަ ދުވަހުގެ ރޭ ދަންވަރު 12:33 ހާއިރު، ހޯރަފުށީ އެއާޕޯޓް މަގުގައި ކަމަށެވެ.

މި އެކްސިޑެންޓް ހިނގަން މެދުވެރިވީ އެއާޕޯޓު މަގުން ދެކުނުން އުތުރަށް ދުއްވާފައި ދިޔަ ސައިކަލުގެ ފަހަތު ފުރޮޅުގެ ހަން ފަޅައިގެން ގޮސް، ކޮންޓްރޯލުން ނެއްޓި ވެއްޓުމުގެ ސަބަބުން ކަމަށް ފުލުހުން ބުންޏެވެ.

މި ހާދިސާގައި އަނިޔާވެފައިވަނީ ސައިކަލު ދުއްވަން އިން 43 އަހަރުގެ އަންހެނަކަށާއި، ފަހަތުގައި އިން 36 އަހަރުގެ އަންހެނަކަށެވެ. އެ ދެ މީހުންނަށް ފުރަތަމަ ފަރުވާދީފައިވަނީ ކުޅުދުއްފުށީ ރީޖަނަލް ހޮސްޕިޓަލުގައެވެ. ނަމަވެސް، ސައިކަލުގެ ފަހަތުގައި އިން 36 އަހަރުގެ އަންހެން މީހާގެ ހާލު ސީރިއަސްވުމާ ގުޅިގެން އިތުރު ފަރުވާއަށް މިހާރު ވަނީ މާލެ ގެނެސް އައިޖީއެމް ހޮސްޕިޓަލަށް ބަދަލުކޮށްފައެވެ.

އަނިޔާވި މީހާގެ ހާލަތާ ގުޅޭގޮތުން އައިޖީއެމްއެޗްގެ ބަހެއް ހޯދުމަށް ކުރި މަސައްކަތުން އަދި އެ ހޮސްޕިޓަލުގެ މީޑިއާ އޮފިޝަލުގެ ޖަވާބެއް ލިބިފައެއް ނުވެއެވެ.

މި އެކްސިޑެންޓް މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.