ރާއްޖޭގައި އިސްލާމްދީނާ ޚިލާފު ފިކުރުތަކާއި ސަގާފަތެއް ދިރުވަން ފުރުސަތު ނުދެއްވާނެ ކަމަށް އަދާލަތު ޕާޓީގެ އިލްމްވެރިންގެ މަޖިލީހުގެ ނާއިބް ރައީސް ޑރ. މުހައްމަދު އިޔާޒު ވިދާޅުވެއްޖެއެވެ.

ޑރ. އިޔާޒު މިހެން ވިދާޅުވީ ކުރީގެ ރައީސް މުޙައްމަދު ނަޝީދުގެ "ދަ ޑިމޮކްރެޓްސް" ޕާޓީ އުފައްދަން އިލެކްޝަންސް ކޮމިޝަނަށް މިއަދު ފޯމް ހުށައެޅުުއްވުމާއެކު އެމެރިކާގެ ޑިމޮކްރެޓިކް ޕާޓީއާއި ގުޅުވައި ޝައިޚު ޒައިދު ދެއްކެވި ވާހަކައަކަށް ތާއީދު ކުރަށްވަމުންނެވެ. އިލެކްޝަންސް ކޮމިޝަނުގައި ކުރިއަށްދިޔަ ބައްދަލުވުމެއްގައި ނަޝީދުގެ ޕާޓީ އުފެއްދުމަށް އެކޮމިޝަނަށް ފޯމު ހުށައެޅުއްވީ ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު އަދި އެމްޑީޕީގެ ކުރީގެ ޗެއާޕާސަން ހަސަން ލަތީފެވެ.

"ދަ ޑިމޮކްރެޓްސް" އަކީ އެމެރިކާގެ ވެރިކަން ކުރާ މަައި ޕާޓީއަށް ވެސް ކިޔާ ނަމެވެ. އެޕާޓީއަކީ އެއްޖިންސުން ގުޅުން ހިންގުމަށް ހިތްވަރުދީ އެކަމަށް ބާރު އަޅާ ޕާޓީއެއް ކަމަށް ދީނީ އިލްމްވެރިޔާ އަލީ ޒައިދު ވަނީ ވިދާޅުވެފައެވެ.

ދިވެހިރާއްޖޭގައި އިސްލާމްދީނާއި ޚިލާފު ފިކުރެއް އަދި ޘަޤާފަތެއް ދިރުވަން ފުރުޞަތު ނުދެވޭނެ، އިންޝާﷲ. https://t.co/Q4bJOs4U4N

— Dr.Mohamed Iyaz (@dr_iyaz) May 21, 2023

ޒައިދުގެ ވާހަކަ ތަކަށް ތާއީދު ކުރަށްވައި އަދާލަތު ޕާޓީގެ އިލްމްވެރިންގެ މަޖިލީހުގެ ނާއިބް ރައީސް ޑރ. މުހައްމަދު އިޔާޒު ވިދާޅުވީ ރާއްޖޭގައި އިސްލާމްދީނާއި ޚިލާފު ފިކުރުތަކާއި ސަގާފަތް ދިރުވަން ފުރުސަތު ނުދެއްވާނެ ކަމަށެވެ.

އެމްޑީޕީގެ ރިޔާސީ ޕްރައިމަރީގައި ލިބުނު ނާކާމިޔާބަށްފަހު ރައީސް ނަޝީދުގެ އަރިސް ބޭފުޅުން ސިޔާސީ ޙަރަކާތްތައް ހިންގަވަމުން ގެންދަވަނީ "ފިކުރެއްގެ ދިރުމުގެ" ނަމުގައެވެ. "ފިކުރެއްގެ ދިރުމުގެ" 12 މަޖިލިސް މެމްބަރުން މިހާރު ވަނީ އެމްޑީޕީން ވަކިވެވަޑައިގެންފައެވެ.

އާ ސިޔާސީ ޕާޓީއެއް އުފައްދާނެކަން ފިކުރެއްގެ ދިރުމުން އިޢުލާނުކުރީ މިދިޔަ ބުދަ ދުވަހު އެވެ.

ނަޝީދުގެ ދަ ޑިމޮކްރެޓްސްގެ ނަމާއި އެމެރިކާގެ ޑިމޮކްރެޓްސް ޕާޓީގެ ނަމާއި އޮތް ގުޅުން ދޭހަކޮށްދޭ މޭރަމުން ޒައިދު ވިދާޅުވީ އެމެރިކާގެ ޑިމޮކްރެޓުންނަކީ އެއްޖިންސުން ގުޅުން ހިންގުމުގެ ނަޖިސް އަމަލަށް ތާއީދުކޮށް ވަކާލާތުކުރާ ބައެއް ކަމަށެވެ.