ނޫސްވެރިކަމުގެ މިނިވަންކަމުގެ އިންޑެކްސްގައި ރާއްޖެ ފަހަތަށް ސޮއްސާލަމުންދިއުމަކީ ހިތާމަހުރިކަމެއްކަމަށް ޖުމްހޫރީ ޕާޓީގެ ލީޑަރު އަދި ރިޔާސީ ކެންޑިޑޭޓް އޮނަރަބަލް ޤާސިމް އިބްރާހީމް (ނ.މ.ޝ.ޢ) ވިދާޅުވެއްޖެއެވެ.

ނޫސްވެރިންނަށް މިނިވަންކަން ހޯދައިދެއްވުމަށް އެންމެ ބޮޑަށް މަސައްކަތް ކުރެއްވި އަދި ނޫސްވެރިންނަށް މިނިވަންކަން ލިބިގެންދިޔަ ގާނޫނު އަސާސީ އެކުލަވާލި މަޖުލީހުގެ ރައީސްކަންވެސް ކުރެއްވި ގާސިމް މިހެން ވިދާޅުވީ ނޫސްވެރިކަމުގެ މިނިވަންކަމުގެ ދުވަހުގެ މުނާސަބާތުގައި، ނޫސްވެރިންނަށް ތަހުނިޔާ ދަންނަވާ ކުރެއްވި ޓްވީޓެއްގައެވެ.

ގާސިމްގެ ޓްވިޓާގައި ވަނީ ދުނިޔޭގެ ނޫސްވެރިކަމުގެ ދުވަހުގެ ހެޔޮއެދުމާއި ތަހުނިޔާ އެންމްމެހާ ނޫސް ވެރިންނަށް ފޮނުއްވާފައެވެ.

ގާސިމް ވިދާޅުވީ ވަކި އަތަކަށް ނުޖެހި އިންސާފުވެރިކަމާއެކު، ރައްޔިތުންނަށް ޚަބަރާއި މައުލޫމާތު ގެނެސްދޭނެ ނޫސްވެރިކަމަކީ ޑިމޮކްރަސީގެ 4 ވަނަ ބާރުކަމާއިމެދު އެއްވެސް ޝައްކެތް ނެތްކަމަށެވެ. އަދި ނޫސްވެރިންގެ މަސައްކަތަށް ދަތިކޮށް، ހުރަސް އަޅައިގެން ނުވާނެކަމަށްވެސް ގާސިމް ވިދާޅުވިއެވެ.

"އިންސާނީ ކަރަމާތް ދަމަހައްޓާ، ތެދުވެރިކަމާއެކު ހަގީގަތް ހާމަކުރުމުގައި ނޫސްވެރިން އަދާކުރަންޖެހޭ ދައުރު ވެރިކަމުގެ ފަރާތުން ހަނިކޮށް، ދަތި ކޮށްގެން ނުވާނެ." ގާސިމް ވިދާޅުވިއެވެ.

Dhuniyege Noosveri kamuge Dhuvahuge Heyo Edhumaai Thahniyaa Enmmehaa Noos verinnah Aris Kurameve.

Vaki athakah nujehi insaafuverikamaaa eku, Raiyyithunnah khabaraa Mauloomaaathu genesdheyne Noos veri kamakee Democracy eh gai 4 vana baaru kameee ehvves shakkeiy oiy kameh…

— Qasim Ibrahim (@qasimibrahim) May 3, 2023

ގާސިމްގެ ޓްވީޓްގައި ވަނީ ދުނިޔޭގެ ނިސްބަތުން ނޫސްވެރިކަމުގެ މިނިވަންކަމުގެ ދަރަޖައިން ޖެހިޖެހިގެން ފަހަތަށް ރާއްޖެ ސޮއްސާލާކަމީ ހިތާމަ ހުރި ކަމެއްކަމަށްވެސް ވިދާޅުވެފައެވެ.