ހުޅުމާލޭގައި މިރޭ ކާރެއް ފުރޮޅާލައި ނުރަށްކާތެރި އެކްސިޑެންޓެއް ހިނގައިފިއެވެ.

ފުލުހުންގެ އިދާރާއިން ބުނީ ހުޅުމާލެ އެމްޑަބްލިއުއެސްސީއާ ދިމާ ހައިވޭ ކައިރިން ކާރެއް ފުރޮޅާލައި އެކްސިޑެންޓެއް ހިނގާފައިވާ ކަމުގެ މައުލޫމާތު މިރޭ 10:30 ހާއިރު ލިބިފައިވާ ކަމަށެވެ.

މި އެކްސިޑެންޓް ހިނގިއިރު ކާރު ދުއްވަން އިނީ 45 އަހަރުގެ ދިވެހި ފިރިހެނެކެވެ. ފުލުހުން ބުނީ ފުލުހުންގެ ޓީމެއް އެކްސިޑެންޓް ހިނގައިގެން އުޅޭ ސަރަހައްދަށް ދިޔައިރު، ކާރު ދުއްވަން އިން މީހާއަށް ލިބިފައިވާ އަނިޔާތަކަށް ފަރުވާ ހޯދުމަށް، ހޮސްޕިޓަލަށް ގެންގޮސްފައިވާ ކަމަށެވެ. އެހެންނަމަވެސް އެ މީހާއަށް ލިބިފައިވާ އަނިޔާގެ ތަފްސީލް އަދި ނުލިބެއެވެ.

ފުލުހުން ގެންދަނީ މި އެކްސިޑެންޓް ހިނގަން މެދުވެރި ސަބަބު އިތުރަށް ތަހުގީގް ކުރަމުންނެވެ.