ރ. އިނގުރައިދޫގެ ފެނާއި ނަރުދަމާ ނިޒާމުގެ މަސައްކަތް ނިންމާ އެ ނިޒާމުގައި ގާއިމު ކުރި ސިސްޓަމްތައް ޓެސްޓްކޮށްފިއެވެ.

ޕްލޭނިން މިނިސްޓްރީން މިއަދު ބުނީ އިނގުރައިދޫގެ ފެނާއި ނަރުދަމާ ސިސްޓަމް ޓެސްޓް ކުރުމުގެ މަސައްކަތް މިދިޔަ މަހުގެ 30 އިން ފެށިގެން މި މަހުގެ 2 ވަނަ ދުވަހާ ހަމައަށް ކުރިޔަށް ގެންގޮސްފައިވާ ކަމަށެވެ.

އަލްޓެކް މޯލްޑިވްސް އާއި ހަވާލު ކޮށްގެން އިނގުރައިދޫގައި ގާއިމުކުރި ފެނުގެ ނިޒާމަކީ "އިންޓަގްރޭޓެޑް ވޯޓާ ރިސޯސް މެނޭޖްމަންޓް" އާ އެއްގޮތަށް އާރްއޯ ސިސްޓަމަށް ވާރޭފެން އެއްކުރެވިގެން ފެނުގެ ހިދުމަތް ދެވޭ ނިޒާމެކެވެ.

ރ. އިނގުރައިދޫ ފެނާއި ނަރުދަމާ ނިޒާމުގެ މަސައްކަތް ނިންމާ، ކޮންޓްރެކްޓަރ @altec_maldives އާއި މިނިސްޓްރީ ގުޅިގެން ވަނީ 30 ޖޫން 2022 އިން 02 ޖުލައި 2202 އަށް ސިސްޓަމް ޓެސްޓުކޮށްފައި. pic.twitter.com/RHewcPmFui

— Min.of National Planning, Housing & Infrastructure (@MoNPHImv) July 18, 2022

މި ނިޒާމުގެ ދަށުން ދުވާލަކު 40 ޓަނުގެ ފެން އުފައްދާ ދެ އާރްއޯ ޕްލާންޓާއި ފެން ރައްކާ ކުރުމަށް 300 ކިއުބިކް މީޓަރުގެ ޓޭންކެއް ވަނީ ގާއިމުކޮށްފައެވެ. އަދި ތިން ޕަންޕިން ސްޓޭޝަނާއި 10.91 ކިލޯމީޓަރުގެ ފެނުގެ އަދި 11.11 ކިލޯމީޓަރުގެ ނަރުދަމާ ވިއުގަ އެއްވެސް ގާއިމުކޮށްފައިވެއެވެ.

އާބާދީގައި ދެހާހެއްހާ މީހުން ދިރިއުޅޭ އިނގުރައިދޫއަކީ އަތޮޅުގެ ނިސްބަތުން އާބާދީ ބޮޑު ރަށެއް ނަމަވެސް ނަރުދަމާގެ ރަނގަޅު ނިޒާމެއް މިހާތަނަށް ގާއިމު ކުރެވިފައި ނެތް ރަށެކެވެ.