މ. މުލަކުގެ ގޮނޑުދޮށް ހިމާޔަތްކުރުމުގެ މަޝްރޫޢުގެ ދެވަނަ ފިޔަވަހީގެ އަމަލީ މަސައްކަތްތައް ބާރު ސްޕީޑުގައި ކުރިއަށްދާ ކަމަށާއި، އެގޮތުން މިހާރު ކުރިއަށްދަނީ ރިވެޓްމަންޓް ޕްރޮފައިލިންގ މަސައްކަތްތައް ކަމަށް އެމްޓީސީސީން ހާމަކޮށްފިއެވެ.

މުލަކަށް ދިމާވެފައިވާ ރަށްގިރުމުގެ މައްސަލައަށް ދާއިމީ ހައްލެއް ހޯދައިދިނުމުގެ މަގުސަދުގައި ކުރިއަށްގެންދާ މި މަޝްރޫޢަކީ 17.66 މިލިއަން ރުފިޔާގެ މަޝްރޫޢެކެވެ.

މި މަޝްރޫޢުގެ ދަށުން މުލަކު ގޮނޑުދޮރުގައި 411.90 މީޓަރުގެ ސަރަހައްދެއްގައި ޖިއޯ ބޭގް ރިވެޓްމަންޓް ޖެހުމަށް ވަނީ ހަމަޖެހިފައެވެ. މިއީ ރަށުގެ ގިރާ ސަރަހައްދު ހިމާޔަތްކޮށް، ގޮނޑުދޮށަށް ލިބެމުންދާ ގެއްލުންތައް ކުޑަކުރުމަށްޓަކައި އެޅޭ މުހިންމު ފިޔަވަޅެކެވެ.

މި މަޝްރޫޢުގެ އެއްބަސްވުމުގައިވާ ގޮތުން މަސައްކަތް ފަށާތާ 105 ދުވަހުގެ ތެރޭގައި އެއްކޮށް ނިންމަން ޖެހެއެވެ.

މި މަޝްރޫޢު ނިމުމުން، މުލަކުގެ ގިރާ ސަރަހައްދުތަކަށް ބޮޑު ހައްލެއް ލިބި، ރަށުގެ ރައްޔިތުންނަށާއި ރަށުގެ އުމްރާނީ ވަސީލަތްތަކަށް ރައްކާތެރިކަން ކަށަވަރުވެގެންދާނެއެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އަންނަނީ ރަށްރަށުގެ ތިމާވެއްޓާއި ގޮނޑުދޮށްތައް ހިމާޔަތްކުރުމަށް ގިނަ މަޝްރޫޢުތަކެއް ހަލުވިކަމާއެކު ކުރިއަށް ގެންދަމުންނެވެ.