މިފްކޯ އަށް ނިމިދިޔަ ސެޕްޓެމްބަރު މަހުގެ ތެރޭގައި ކިރުވި މަހަށް، މަސްވެރިންނަށް 27.3 މިލިއަނަށް ވުރެ ގިނަ ރުފިޔާ ދޫކޮށްފައިވާ ކަމަށް އެ ކުންފުނިން ހާމަކޮށްފިއެވެ.

މިފްކޯއިން އާންމުކޮށްފައިވާ މަހުގެ ތަފާސްހިސާބުތަކަށް ބަލާއިރު، ސެޕްޓެމްބަރު މަހުގެ ތެރޭގައި ޖުމްލަ 453 ދޯންޏަކުން އެ ކުންފުންޏަށް ވަނީ މަސް ކިރުވާފައެވެ. އަދި އެ ދޯނިތަކުން ކިރުވި 1،288.42 ޓަނުގެ މަހަށްވާ 27،

323،275.00 ރުފިޔާ މިހާރު ވަނީ މަސްވެރިންނަށް ޚަލާޞްކޮށްފައެވެ.

އެ ކުންފުންޏަށް ކިރުވި މަހުގެ ބާވަތްތަކުގެ ތަފްސީލަށް ބަލާއިރު، އެންމެ ބޮޑު ބައެއް ހިއްސާކުރަނީ ކަޅުބިލަމަހެވެ. އެގޮތުން 451 ދޯންޏަކުން 1،284.1 ޓަނުގެ ކަޅުބިލަމަސް ކިރުވާފައިވާއިރު، އެ މަހަށް 27،226،550.00 ރުފިޔާ ވަނީ ދޫކޮށްފައެވެ. ކަންނެލީގެ ބާވަތްތަކަށް ބަލާއިރު، 10 ކިލޯއިން މަތީގެ 0.5 ޓަނުގެ ކަންނެލި އެއް ދޯނިން ކިރުވައިގެން 900 ރުފިޔާ ލިބިފައިވާއިރު، 15 ކިލޯއިން މަތީގެ 3.8 ޓަނުގެ ކަންނެލި ކިރުވި 5 ދޯންޏަކަށް ވަނީ 95،825.00 ރުފިޔާ ދޫކޮށްފައެވެ.

މި އަހަރުގެ މިހާތަނަށް މިފްކޯއިން އެންމެ ގިނަ އަދަދަކަށް މަސްވެރިންނަށް ފައިސާ ދޫކޮށްފައިވަނީ ވޭތުވެދިޔަ އޭޕްރީލް މަހުގައެވެ. އެ މަހު 78.8 މިލިއަން ރުފިޔާ މަސްވެރިންނަށް ދޫކުރިއެވެ. އަދި އެންމެ މަދުން ފައިސާ ދޫކުރެވުނު ޖޫން މަހު ދޫކޮށްފައިވަނީ 11.3 މިލިއަން ރުފިޔާއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން މަސްވެރިކަމުގެ ސިނާއަތް ކުރިއެރުވުމަށާއި މަސްވެރިންގެ ލާބައަށް ގިނަގުނަ މަސައްކަތްތަކެއް ދަނީ ކުރަމުންނެވެ. މިގޮތުން މަސްވެރިން ބާނާ މަހަށް ކިރުވާތާ 48 ގަޑިއިރުގެ ތެރޭގައި ފައިސާ ދިނުމުގެ އިންތިޒާމު ހަމަޖައްސައިދީފައިވާއިރު، މާލެ ސަރަހައްދުގައި ހަރަކާތްތެރިވާ އޮޑިދޯނިފަހަރަށް ދިމާވެފައިވާ އައިސް ލިބުމުގެ ދަތިކަން ހައްލުކުރުމަށް ކ. ކަނޑުއޮތްގިރިން މަސްވެރިންނަށް އައިސް ފޯރުކޮށްދިނުމުގެ ޚިދުމަތް ވެސް ޖުލައި މަހުން ފެށިގެން ސަރުކާރުން ވަނީ ފަށާފައެވެ.