މާލޭގެ ގެއަކުން ފެން މީޓަރެއް ވަގަށް ނެގި މައްސަލައެއްގައި ކުށް ސާބިތުވި މީހަކު 21،600 ރުފިޔާއިން ޖޫރިމަނާ ކުރުމަށް ކްރިމިނަލް ކޯޓުން ހުކުމްކޮށްފިއެވެ.

މި މައްސަލައިގައި ދައުލަތުން ވައްކަމުގެ ދައުވާ އުފުލާފައިވަނީ އއ. ތޮއްޑޫއަށް ނިސްބަތްވާ މީހެއްގެ މައްޗަށެވެ. ޕްރޮސިކިއުޓަރ ޖެނެރަލްގެ އޮފީހުން ކޯޓަށް ހުށަހެޅި މައްސަލައިގައި ބަޔާންކޮށްފައިވާ ގޮތުގައި، އޭނާ ފެން މީޓަރު ވަގަށް ނަގާފައިވަނީ މިއަހަރުގެ އެޕްރީލް މަހުގެ 16 ވަނަ ދުވަހުގެ ހަވީރު 4:00 ހާއިރު، އޯކިޑްމަގުގައި ހުންނަ މ. މާކޮޅުގެއިންނެވެ.

މި މައްސަލައިގެ ޝަރީއަތުގެ މަރުހަލާގައި، އިބްތިދާއީ އަޑުއެހުމުގައްޔާއި އަވަސްނިޔާގެ މަޖިލީހުގައިވެސް ދައުވާލިބޭ މީހާ ވަނީ އެއްވެސް މަޖުބޫރުކަމެއް ނެތި ކުށަށް އިއުތިރާފުވެފައެވެ. އެހެންކަމުން، ގާނޫނުގައިވާ ގޮތުގެ މަތިން އޭނާގެ އިއުތިރާފުން ކުށް ސާބިތުވާ ކަމަށް ކޯޓުން ވަނީ ކަނޑައަޅާފައެވެ.

ދިވެހިރާއްޖޭގެ ގާނޫނުލްއުގޫބާތުގައި ވައްކަމުގެ މިފަދަ ކުށްތަކަށް ކަނޑައަޅާފައިވާ އަސާސީ އަދަބަކީ ޖަލަށްލުމެވެ. އެގޮތުން މައްސަލައިގެ ކަންކަމަށް ރިއާޔަތްކޮށް، ޝަރީއަތުން ފުރަތަމަ ކަނޑައެޅީ ތިން މަހާއި 18 ދުވަހުގެ ޖަލު ހުކުމެކެވެ. ނަމަވެސް، ކުށް ސާބިތުވި މީހާއަކީ ވަޒީފާއެއް އަދާކުރަމުންދާ މީހަކަށް ވާތީ، ޖަލު އަދަބުގެ ބަދަލުގައި ޖޫރިމަނާއެއް ކަނޑައަޅައިދިނުމަށް އޭނާގެ ފަރާތުން އެދިފައިވެއެވެ. މި އެދުމަށް ރިއާޔަތްކޮށް، ގާނޫނުލްއުގޫބާތާއި ސުޕްރީމް ކޯޓުގެ ކަނޑައެޅުންތަކާ އެއްގޮތްވާ ގޮތުގެ މަތިން ޖަލު އަދަބު ވަނީ ޖޫރިމަނާއަކަށް ބަދަލުކޮށްދީފައެވެ.

ކްރިމިނަލް ކޯޓުގެ އިސް ގާޟީ އާދަމް މުޙައްމަދު ކުރެއްވި ހުކުމުގައި އަންގަވާފައިވަނީ، 21،600 ރުފިޔާގެ ޖޫރިމަނާ ފައިސާ މި ހިނގާ މަހުގެ އެއްވަނަ ދުވަހުން ފެށިގެން ކުރިއަށް އޮތް 12 މަސްދުވަހުގެ ތެރޭގައި މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އަށް ދައްކައި ޚަލާސްކުރުމަށެވެ. އަދި ދީފައިވާ މުއްދަތުގެ ތެރޭގައި އެ ފައިސާ ނުދައްކައިފިނަމަ، އަލުން ޖަލު ހުކުމް ތަންފީޒުކުރަން ޖެހޭނެ ކަމަށްވެސް ކޯޓުގެ ހުކުމުގައި ވަނީ ފާހަގަކުރައްވާފައެވެ.