އެމްޑީޕީގެ ރައީސް އަދި ނައިބު ރައީސްގެ މަގާމު އުވާލާ، ހުރިހާ ބާރެއް ޗެއަރޕާސަން އަށް ދިނުމަށް އެޕާޓީގެ ކޮންގުރެސް އިން މިއަދު ފާސްކޮށްފިއެވެ.

މިހާރު ކުރިއަށްދާ އެމްޑީޕީގެ ކޮންގްރެސްގައި، އެ ޕާޓީގެ ލީޑަޝިޕްގެ އޮނިގަނޑަށް ވަނީ ބޮޑެތި ބަދަލުތަކެއް ގެނައުމަށް ފާސްކޮށްފައެވެ. އެގޮތުން ޕާޓީގެ ރައީސްކަމާއި ނައިބު ރައީސްކަމުގެ މަގާމު މުޅިން އުވާލައި، ޕާޓީގެ އެންމެ އިސް ފަރާތަކީ ޗެއަރޕާސަން ކަމަށް ކަނޑައެޅުމަށް އަސާސީ ގަވާއިދަށް އިސްލާހު ހުށަހެޅުއްވީ ކުރީގެ ޗެއަރޕާސަން ފައްޔާޒު އިސްމާއިލް އެވެ. ކޮންގްރެސްގެ 546 މަންދޫބުންގެ އަޣުލަބިއްޔަތުން މި އިސްލާހުތައް ވަނީ ފާސްކޮށްފައެވެ.

މި އާ އިސްލާހުތަކުގެ ދަށުން ޗެއަރޕާސަނަށް އެހެން އެއްވެސް މަގާމެއް އަދާނުކުރެވޭ ގޮތަށް ހަމަޖައްސާފައިވާއިރު، ސިޔާސީ ކަންކަމަށް ހާއްސަ އައު ނައިބު ޗެއަރޕާސަންގެ މަގާމެއް ވަނީ އުފައްދާފައެވެ. މީގެ އިތުރުން ޕާޓީގެ ޓިކެޓުގައި ވެރިކަމަށް ހޮވޭ ރައީސުލްޖުމްހޫރިއްޔާއަކު ސަރުކާރު އެކުލަވާލުމާއި މުހިންމު ސިޔާސަތުތައް ތަންފީޒުކުރުމުގައި ގައުމީ މަޖިލީހުގެ މަޝްވަރާ ހޯދުމަށް އެއްބަސްވުމެއްގައި ސޮއިކކުރުން ލާޒިމުކުރުމާއި، ރައީސުލްޖުމްހޫރިއްޔާގެ އިސް މުޝީރަކަށް ޗެއަރޕާސަން ހަމަޖެއްސުމަށް ވެސް ވަނީ ފާސްކޮށްފައެވެ.

މި ކޮންގްރެސްގައި އެމްޑީޕީގެ ޕީޖީ ލީޑަރު އިބްރާހިމް ނާޒިލް އާއި ކުޑަހުވަދޫ ދާއިރާގެ ރައީސް ޝާތިރު ޢަބްދުއްރަޙްމާން ހުށަހެޅުއްވި އިސްލާހުތައް ވެސް ވަނީ ފާސްވެފަ އެވެ. އޭގެ ތެރޭގައި އެތެރޭގެ އިންތިހާބުތަކަށް 4 މަސްދުވަސް ކުރިން އިއުލާނުކުރުމާއި، ވޯޓުލާ ދުވަހުގެ 3 މަސްކުރިން ޕާޓީގައި ރަޖިސްޓްރީގައިވާ މެންބަރުންނަށް ވޯޓުލުމުގެ ހައްގު ދިނުން ހިމެނެއެވެ. އަދި ގައުމީ މަޖިލީހުގައި ކޮންމެ ރަށަކުން އެއް މެންބަރަކު ތަމްސީލުކުރުމުގެ އުސޫލު ދެމެހެއްޓުމާއި، ކޮންގްރެސްގެ ބައިވެރިންގެ ލިސްޓު 10 ދުވަސްކުރިން އިއުލާނުކުރުން ވެސް މީގެ ތެރޭގައި ހިމެނެއެވެ.