ބިމާ 63 އަލި އަހަރަށް ވުރެ ދުރުގައިވާ އާދަޔާ ޙިލާފު ބޮޑު އެކްސޯޕްލެނެޓެއް ކަމަށްވާ "ބީޓާ ޕިކްޓޯރިސް ބީ" އިން ރޭޑިއޯ ރާޅުތަކެއް ދޫކުރާކަން ފަލަކީ އިލްމުވެރިންނަށް ފާހަގަކުރެވިއްޖެއެވެ.

މި ސިގްނަލްތަކަކީ އެ ޕްލެނެޓުގެ ދެ ތަނޑީގެ ސަރަޙައްދުގައި އުފެދޭ އޯރޯރާގެ ހަރަކާތްތަކާ ގުޅިފައިވާ ސިގްނަލްތަކެއް ކަމަށް ބެލެވޭތީ، އެ ޕްލެނެޓުގައި އާދަޔާ ޚިލާފު ބާރުގަދަ މެގްނެޓިކް ފީލްޑެއް (ދަމާބާރުގެ ދާއިރާއެއް) އޮތް ކަމަށް ލަފާކުރެވެއެވެ.

މި ހޯދުން ކަށަވަރުވެއްޖެނަމަ، "ބީޓާ ޕިކްޓޯރިސް ބީ" ވެގެންދާނީ އިރުގެ ނިޒާމުން ބޭރުގައިވާ ޕްލެނެޓުތަކުގެ ތެރެއިން މެގްނެޓިކް ފީލްޑެއް ސީދާ ދެނެގަނެވުނު ފުރަތަމަ ޕްލެނެޓަށެވެ. ދިރާސާވެރިން އަންދާޒާކުރާ ގޮތުގައި މި ޕްލެނެޓުގެ މެގްނެޓިކް ފީލްޑްގެ ބާރުމިން މަދުވެގެން 1,250 ގައުސް އަށް އަރާނެއެވެ. މިއީ ބިމުގެ 0.5 ގައުސް އަދި ޖުޕިޓާގެ 14 ގައުސް އާ އަޅާބަލާއިރު ވަރަށް ބޮޑު އަދަދެކެވެ.

މި ޕްލެނެޓުގެ އުމުރަކީ ގާތްގަނޑަކަށް އެންމެ 25 މިލިއަން އަހަރެވެ. މިފަދަ ޅަ އުމުރެއްގެ ސަބަބުން އެ ޕްލެނެޓުގެ މެގްނެޓިކް ބާރު މިހާ ގަދަވުމަށް މަގުފަހިވެފައި އޮވެދާނެ ކަމަށް ބެލެވެއެވެ. މީގެއިތުރުން، މި އޯރޯރާ އުފެދުމުގައި އަދި ހޯދިފައިނުވާ ހަނދެއްގެ ދައުރެއް ވެދާނެ ކަމާމެދު ވެސް ސައިންސްވެރިން ދަނީ ވިސްނަމުންނެވެ.

މި ހޯދުމަކީ ޕްލެނެޓުތަކުގެ އެތެރޭގެ އޮނިގަނޑު ދެނެގަތުމަށާއި، ކުދި ޕްލެނެޓުތަކުގައިވާ މެގްނެޓިކް ފީލްޑްތައް ހޯދުމަށް ފަލަކީ އިލްމުވެރިންނަށް ލިބިގެންދާނެ މުހިންމު ކުރިއެރުމެކެވެ. ނަމަވެސް، މި ދިރާސާއަކީ އަދި މި ދާއިރާގެ އެހެން މާހިރުންގެ މުރާޖަޢާ (ޕިއަރ-ރިވިއު) ލިބިފައިވާ ދިރާސާއަކަށް ނުވާތީ، މިކަން ފުރިހަމައަށް ކަށަވަރުކުރުމަށްޓަކައި އިތުރު ދިރާސާތަކާއި ބެލުންތައް ބޭނުންވެއެވެ.