ސައުދީ އަރަބިއްޔާގެ ގައުމީ އެއާލައިން، "ސައުދިއާ" ގެ ފުރަތަމަ އަންހެން ޕައިލެޓުގެ މަގާމު ބަލްޤީސް އަލްފަރަޖް ހޯދައި، އެ ގައުމުގެ އޭވިއޭޝަން ދާއިރާއިން އާ ތާރީޚީ ކާމިޔާބީއެއް ގާއިމުކޮށްފިއެވެ.

ބަލްޤީސް މި ކާމިޔާބީ ހޯދާފައިވަނީ އެއާބަސް އޭ320 މަރުކާގެ ބޯޓުތައް ދުއްވުމަށް ބޭނުންވާ "ޓައިޕް ރޭޓިންގް" ތަމްރީނުތައް ކާމިޔާބުކަމާއެކު ފުރިހަމަކުރުމަށްފަހުގައެވެ.

އޭނާ ވަނީ އެމެރިކާގެ ފްލޮރިޑާގައި ފްލައިޓް ތަމްރީނުތައް ފުރިހަމަކުރުމަށްފަހު، 2020 ވަނަ އަހަރު ސައުދީ އަރަބިއްޔާގެ ޖެނެރަލް އޮތޯރިޓީ އޮފް ސިވިލް އޭވިއޭޝަން (ޖީއޭސީއޭ) އާއި އެމެރިކާގެ ފެޑެރަލް އޭވިއޭޝަން އެޑްމިނިސްޓްރޭޝަން (އެފްއޭއޭ) އިން ކޮމާޝަލް ޕައިލެޓް ލައިސަންސް ހޯދާފައެވެ.

މި އުފާވެރި ޚަބަރު ލިންކްޑްއިން މެދުވެރިކޮށް ހިއްސާކުރަމުން ބަލްޤީސް ވަނީ، އޭނާގެ މި ކާމިޔާބު ދަތުރުގައި ދިން އެއްބާރުލުމާއި އެހީތެރިކަމަށްޓަކައި އާއިލާއަށާއި، އިންސްޓްރަކްޓަރުންނާއި، މެންޓަރުންގެ އިތުރުން ސައުދީ އެއާލައިންސަށް ވަރަށް ބޮޑަށް ޝުކުރު އަދާކޮށްފައެވެ.

މިއީ ސައުދީ އަރަބިއްޔާގެ ވައިގެ ދަތުރުފަތުރުގެ ދާއިރާގައި އަންހެނުންގެ ދައުރު ފުޅާކުރުމަށް ކުރެވޭ މަސައްކަތްތަކަށް ލިބުނު ބޮޑު ކުރިއެރުމެކެވެ.