ސިނގިރޭޓު ކާޓޫނުތަކެއް ވަގަށް ނެގި މީހަކު ހައްޔަރުކޮށްފިއެވެ.

ފުލުހުން ބުނީ މިދިޔަ ނޮވެމްބަރު މަހުގެ ދެވަނަ ދުވަހުގެ 5:40 ހާއިރު ފުލުހުން ޕެޓްރޯލް ކުރަމުންދިޔައިރު، އޮލިމްޕަސް ކައިރިން ދިޔަ މީހަކާމެދު ތުހުމަތުކުރެވިގެން އޭނާ ހުއްޓުވައި، އޭނާ ގެންގުޅުނު ދަބަސްތަކާއި ކޮތަޅުތަކެއް ބަލައިފާސްކުރިއިރު ގިނަ އަދަދެއްގެ ސިނގިރޭޓު ކާޓޫނުތަކެއް ފެނިފައިވާ ކަމަށެވެ.

ފުލުހުން ކުރި ތަހުގީގުން، އެ ސިނގިރޭޓު ކާޓޫނުތަކަކީ އޯޝަން ނޮޓިކަލް ޕްރައިވެޓް ލިމިޓެޑުން އޭނާ ވަގަށްނެގި ތަކެތިކަން އެނގިފައިވާކަމަށް ފުލުހުން ބުނެއެވެ.

މި މައްސަލައާ ގުޅިގެން ހައްޔަރުކޮށްފައި ވަނީ ށ. ފޭދޫ، ހިރުނދުމާގެ، އުމުރުން 24 އަހަރުގެ އަހްމަދު ލުޖެއިން އެވެ. އެމީހާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ފަސް ދުވަހުގެ ބަންދު އަމުރެއް ނެރެދީފައިވާކަމަށް ފުލުހުން މައުލޫމާތުދެއެވެ.

މި މައްސަލަ ފުލުހުން ގެންދަނީ ތަހުގީގު ކުރަމުންނެެވެ.