ސިޑްސްގެ އިންޓަރނޭޝަނަލް ކޮންފަރެންސްގެ އިންތިޒާމް ކޮމިޓީގެ ރިޔާސަތަށް ދިވެހިރާއްޖެ ހަމަޖައްސައިފިއެވެ.

ސްމޯލް އައިލެންޑް ޑިވެލޮޕިންގ ސްޓޭޓްސް، ސިޑްސްގެ 4 ވަނަ އިންޓަރނޭޝަނަލް ކޮންފަރެންސް އޮންނާނީ އަންނަ އަހަރު އެންޓިއުގާ އެންޑް ބަރބުޑާގައެވެ.

މިއަދު އެމެރިކާގެ ނިއުޔޯކްގައި އޮތް ސިޑްސްގެ އޯގަނައިޒޭޝަނަލް ސެޝަންގައި ކޮންފަރެންސްގެ އިންތިޒާމް ކޮމިޓީގެ ރިޔާސަތަށް ދިވެހިރާއްޖޭގެ އިތުރުން ނިއުޒިލެންޑްވެސް ވަނީ ހަމަޖައްސާފައެވެ.

Maldives elected as Co-chair of Preparatory Committee for the Fourth International Conference on SIDS

📃 Press Release | https://t.co/rUIGWdlNML pic.twitter.com/8rFUio7xd4

— Ministry of Foreign Affairs 🇲🇻 (@MoFAmv) May 30, 2023

އިންތިޒާމް ކޮމިޓީގައި ރާއްޖެ ތަމްސީލްކުރާނީ ރާއްޖެއިން އދ.އަށް ކަނޑައަޅުއްވާފައި ހުންނަވާ ސަފީރު ތިލްމީޒާ ހުސައިންނެވެ. މި ކޮމިޓީޢަކީ ސިޑްސްގެ 4 ވަނަ އިންޓަރނޭޝަނަލް ކޮންފަރެންސްގެ ހުރިހާ ކަމެއް ރާވާ، ހިންގާ، އިންތިޒާމްކުރުމުގެ މަސްއޫލިއްުޔަތު އޮންނަ ކޮމިޓީއެކެވެ.

ރާއްޖެއިން މި ކޮމިޓީގައި މަސައްކަތްކުރާއިރު ސިޑްސްގެ ޤައުމުތަކުގެ ގުޅުން ވަރުގަދަކޮށް، ބައިނަލްއަޤްވާމީ މުޖްތަމަޢުއާއި ސިޑްސްއާ އޮންނަ ގުޅުން އިތުރަށް ހަރުދަނާކުރުމަށް މަސައްކަތްކުރާނެއެވެ.

ސިޑްސްގެ 4 ވަނަ އިންޓަރނޭޝަނަލް ކޮންފަރެންސްގައި ޤައުމުތަކުގެ ލީޑަރުންގެ މެދުގައި ދެމެހެއްޓެނި ތަރައްޤީއަށް މަސައްކަތްކުރުމަށް ކަނޑައަޅާފައިވާ ލަނޑުދަނޑިތައް ހާސިލްކުރެވޭނެ ގޮތްތަކާއި ބެހޭގޮތުން މަޝްވަރާކުރާނެއެވެ. މީގެއިތުރުންވެސް މުހިއްމު އެތައް ކަންކަމާއި ގުޅޭގޮތުން ސިޑްސްގެ ކޮންފަރެންސްގައި މަޝްވަރާކުރާނެއެވެ.