ދުނިޔޭގެ ފަތުރުވެރިކަމުގެ ދުވަހާ ގުޅުވައިގެން ރާއްޖޭގެ ކްރޮސްރޯޑްސް މޯލްޑިވްސްގައި ރޭ ބޭއްވި "ވޯލްޑް ޓްރެވަލް އެވޯޑްސް (އޭޝިއާ، އޯޝޭނިއާ އެންޑް އިންޑިއަން އޯޝަން) ގާލާ ސެރެމަނީ 2026" ގައި ދިވެހިރާއްޖެއިން އިންޑިއާ ކަނޑުގެ ސަރަހައްދުގެ އެންމެ ޝަރަފުވެރި ފަސް އެވޯޑެއް ކާމިޔާބުކޮށް، ދުނިޔޭގެ ފަތުރުވެރިކަމުގެ ޗާޓުގައި ރާއްޖޭގެ މަގާމު އަނެއްކާވެސް ވަރުގަދަކޮށްފިއެވެ.

މި ރަސްމިއްޔާތުގައި ރާއްޖެއަށް ލިބުނު މުހިންމު ކާމިޔާބީތަކުގެ ތެރޭގައި އިންޑިއާ ކަނޑުގެ ސަރަހައްދުގެ އެންމެ ކުރިއަރާފައިވާ މަންޒިލް ނުވަތަ 'ލީޑިން ޑެސްޓިނޭޝަން' ގެ ލަގަބުގެ އިތުރުން، އެންމެ މަގުބޫލު ޑައިވިން، ގްރީން އަދި ހަނީމޫން ޑެސްޓިނޭޝަންގެ އެވޯޑު ހިމެނެއެވެ. އަދި ހަމައެއާއެކު، ސަރަހައްދުގެ އެންމެ ފާހަގަކޮށްލެވޭ ޓޫރިސްޓް ބޯޑުގެ ޝަރަފު ވިޒިޓް މޯލްޑިވްސް ކޯޕަރޭޝަން (ވީއެމްސީ) އިން ވަނީ ހާސިލުކޮށްފައެވެ.

މި ރަސްމިއްޔާތުގައި ރާއްޖެއިން ކާމިޔާބުކުރި އެވޯޑުތަކަކީ:

އިންޑިއަން އޯޝަންސް ލީޑިން ޑެސްޓިނޭޝަން 2026

އިންޑިއަން އޯޝަންސް ލީޑިން ޑައިވް ޑެސްޓިނޭޝަން 2026

އިންޑިއަން އޯޝަންސް ލީޑިން ގްރީން ޑެސްޓިނޭޝަން 2026

އިންޑިއަން އޯޝަންސް ލީޑިން ހަނީމޫން ޑެސްޓިނޭޝަން 2026

އިންޑިއަން އޯޝަންސް ލީޑިން ޓޫރިސްޓް ބޯޑު 2026 (ވިޒިޓް މޯލްޑިވްސް ކޯޕަރޭޝަން / ވީއެމްސީ)

މީގެ އިތުރުން، ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ 15 އަށް ވުރެ ގިނަ ކުންފުންޏާއި ބްރޭންޑަކުން ވަނީ އިންޑިއާ ކަނޑުގެ ސަރަހައްދުގެ އެކި ދާއިރާތަކުން ފާހަގަކޮށްލެވޭ އެވޯޑުތައް ހާސިލުކޮށްފައެވެ. އޭގެ ތެރޭގައި ލަގްޒަރީ ރިސޯޓްތަކާއި، އޭވިއޭޝަން، ޑައިވިން، ފެމިލީ އަދި ހަނީމޫން ފަތުރުވެރިކަމުގެ އިތުރުން ޕްރައިވެޓް އައިލެންޑް، ސުޕަ ޔޮޓް އަދި ދެމެހެއްޓެނިވި ފަތުރުވެރިކަމުގެ ދާއިރާތައް ހިމެނެއެވެ.

ދުނިޔޭގެ 40 އަށް ވުރެ ގިނަ ގައުމުގެ ފަތުރުވެރިކަމުގެ އިސް ވެރިން ބައިވެރިވެވަޑައިގެންނެވި މި ޖަލްސާގައި ވާހަކަދައްކަވަމުން، ޓޫރިޒަމް އެންޑް ސިވިލް އޭވިއޭޝަން މިނިސްޓަރު މުހައްމަދު އަމީން ވިދާޅުވީ، 1972 ވަނަ އަހަރު އެންމެ ދެ ރިސޯޓާއެކު ފެށުނު ދަތުރު މިއަދު ވެފައިވަނީ ދުނިޔެ ބަލައިގަންނަ ފަދަ ކާމިޔާބު ނަމޫނާއަކަށް ކަމަށެވެ. އަދި ރާއްޖެ އިޝްތިހާރު ކުރުމުގައި ވިޒިޓް މޯލްޑިވްސްއިން ކުރަމުންދާ އަގުހުރި މަސައްކަތްތައް ފާހަގަކުރައްވައި، ތިމާވެއްޓާ ރައްޓެހި ދެމެހެއްޓެނިވި ފަތުރުވެރިކަމެއްގެ މުހިންމުކަމުގެ މައްޗަށް މިނިސްޓަރު އަލިއަޅުއްވާލެއްވިއެވެ. މި ރަސްމިއްޔާތުގައި ވޯލްޑް ޓްރެވަލް އެވޯޑްސްގެ ފައުންޑާ އަދި ޕްރެޒިޑެންޓް ގްރަހަމް ކުކް ވެސް ބައިވެރިވެވަޑައިގެންނެވިއެވެ.

ވިޒިޓް މޯލްޑިވްސްގެ ސީއީއޯ އަދި މެނޭޖިން ޑައިރެކްޓަރު އަބްދުﷲ ޔާސިރު ވިދާޅުވީ، މި ލިބުނު ފަސް އެވޯޑަކީ ދިވެހި ފަތުރުވެރިކަމުގެ ވަރުގަދަ ބިންގަލާއި ފުރިހަމަކަން ދައްކުވައިދޭ ހެއްކެއް ކަމަށެވެ. އަދި މިއީ ދުނިޔޭގެ ފަތުރުވެރިންނަށް ރާއްޖެއިން ފޯރުކޮށްދޭ ފެންވަރު ރަނގަޅު ހިދުމަތްތަކާއި ލިބިދޭ ތަފާތު ތަޖުރިބާތަކުގެ ނަތީޖާ ކަމުގައި އޭނާ ފާހަގަކުރެއްވިއެވެ.

ރާއްޖެއަކީ 2020 އިން 2025 އަށް ޖެހިޖެހިގެން ހަ އަހަރު ދުނިޔޭގެ އެންމެ ކުރިއަރާފައިވާ މަންޒިލް (ވޯލްޑްސް ލީޑިން ޑެސްޓިނޭޝަން) ގެ މަގާމު ދިފާއުކޮށްފައިވާ ގައުމެކެވެ. މީގެ އިތުރުން، "ވޯލްޑްސް ލީޑިން ޓޫރިސްޓް ބޯޑު" އާއި "ވޯލްޑްސް ލީޑިން ގްރީން ޑެސްޓިނޭޝަން" އަދި "ވޯލްޑްސް ލީޑިން ބީޗް ޑެސްޓިނޭޝަން" ފަދަ ޝަރަފުވެރި އެތައް އެވޯޑެއް ރާއްޖެއިން މީގެ ކުރިން ވެސް ހާސިލުކޮށްފައިވެއެވެ.

1993 ވަނަ އަހަރުން ފެށިގެން ދެމުން އަންނަ ވޯލްޑް ޓްރެވަލް އެވޯޑްސްގެ މިއަހަރުގެ ގާލާ ހަފުލާގެ ޓައިޓަލް ސްޕޮންސަރަކީ ބޭންކް އޮފް މޯލްޑިވްސް (ބީއެމްއެލް) އެވެ. މީގެ އިތުރުން އުރީދޫ، ޕްރިންޓް ލެބް، އެލައިޑް އިންޝުއަރެންސް، އެމްއޭސީއެލް، ޖަލްބޫތު، އިވެންޓް މޯލްޑިވްސް، މޯލްޑިވިއަން އަދި އެސްޓީއޯ އެނަޖީން ވަނީ މި ހަރަކާތަށް އެހީތެރިކަން ފޯރުކޮށްދީފައެވެ.